Қаржы қызметінің үздігі

Қаржыгерлердің төл мерекесінде Сырдария ауданы бойынша Мемлекеттік кірістер басқармасының басшысы Ашраф Жүсіпов «Қазақстан Республикасының Қаржы қыз­метінің үзідігі» төсбелгісімен марапатталды. Министрліктен келген марапатты Департамент басшысы Ғани Аманов салтанатты түрде табыстады.

Департамент басшысы мерекелік басқосуда ұлттық ва­люта – теңгенің шығу тарихына, қалыптасу кезеңіне тоқ­талып, қызметкерлерді қаржыгерлердің атаулы күнімен құт­тық­тады.

– Сіздерді кәсіби мерекелеріңіз – Қаржыгерлер және Ұлттық валютамыз – Теңге күнімен құттықтай отырып, ел мүддесі жолындағы еңбектеріңізге табыс тілеймін. Тәуелсіз Қазақстанымыздың және Сыр өңірі экономикасының қар­жылай ахуалын нығайту жолындағы істеріңіз берекелі болсын. Сыр өңірінің қаржы қазаны ортаймасын, еліміздің ырыс-құты арта берсін, – деген департамент басшысы  қаржыгерлердің еңбегі экономиканың барлық саласында жоғары сұранысқа ие екенін атап өтті. Белгіленген мақсаттар мен міндеттерге қол жеткізудің табыстылығы ақша ресурстарын сауатты жоспарлау мен бөлуге байланысты екенін айтты.

Ғ.Аманов мереке қарсаңында марапат биігінен көрініп жатқан әріптестерінің еңбегін жоғары бағалады. Атап айтқанда, «Қазақстан Республикасының Қаржы қызметінің үздігі» медалімен марапатталған Сырдария ауданы бо­йынша Мемлекеттік кірістер басқармасының басшысы Ашраф­ Жүсіповтің қызметте жоғары жетістікке жетіп, әріп­тестеріне үлгі-өнеге көрсеткенін айтты.

– Өздеріңіз білетіндей, «Қаржы қызметінің үздігі» төс­белгісі лауазымдық міндеттерін үлгілі атқарғаны, мін­сіз мемлекеттік қызметі үшін беріледі. Сондай-ақ бұл төс­белгімен ерекше маңызды және күрделі тапсырмаларды орындап, жемісті еңбегімен және жұмыстағы басқа да жетістіктерімен танылған азаматтар марапатталады. Айтып өту керек, төсбелгіге тек Қазақстан Республикасы қаржы жүйесінің органдарында кемінде 10 жыл мінсіз жұ­мыс істеген қаржы жүйесінің қызметкерлері және өзге де адам­дар марапатталады. Ашраф Жүсіпов – осы талаптардың бә­ріне сай жұмыс істеген, ұжымды жақсы басқарып, салық базасының артуына үлес қосып келе жатқан әріптесіміз. Сондықтан марапатымен құттықтап, алдағы жұ­мыстарына сәттілік тілейміз, – деді Департамент басшысы.

Салтанатты жиында саланың өзге де үздіктері ҚР Қар­жы министрлігінің «Құрмет Грамотасымен», «Алғыс хатымен» ма­рапатталды.

А.ИБРАГИМҰЛЫ