Сырдариялық шаруалардың дәстүрлі жәрмеңкесі облыс орталығында өтті

Кеше облыс орталығындағы Жанқожа батыр көшесі, «Реалбаза» аймағында Сырдария ауданы еңбеккерлерінің ауылшарушылығы өнімдерінің жәрмеңкесі өткізілді.

Жылдағы дәстүр бойынша мереке аясында ауылшаруашылығы өнімдерінің жәрмеңкесі жоғары деңгейде ұйымдастырылып, Тереңөзек кенті мен барлық ауылдардан арнайы келген шаруашылықтар өз өнімдерін тұрғындарға арзан бағамен ұсынды.

Молшылық мерекесіне жиналғандардың қарасы қалың. Бірі көкөніс сатып алуға бет алса, енді бірі ет-сүт өнімдерін сатушылардың қасынан табылды. Бақша өніміне деген сұраныс та өте жоғары.

Бүгінгі жәрмеңкеге ауданнан ақ күріш – 15 тонна, жем – 17 тонна, картоп – 15,5 тонна, жуа – 21 тонна, сәбіз – 8 тонна, асқабақ – 13 тонна, сүт, айран, қымыз – 350 литр, балық – 100 кг, құс еті – 170 кг, сиыр,жылқы еті – 1,8 тонна, қауын – 24 тонна, қарбыз-23 тонна, қызылша – 540 кг, қызанақ,қияр – 240 кг, алма – 900 кг, жиде – 260 кг, тосап (варенья), салат – 30 литр, бал – 115 литр, тоқты – 20 бас, 7 көлік жоңышқа, қамыс пресс шөбі, қосымша нан өнімдер, 54 көлікпен 30 түрінен барлығы 170 тонна 22 млн.теңгені құрайтын ауыл шаруашылығы өнімдері жеткізілді.

Облыс орталығында өткен жәрмеңкеде қала тұрғындары қолжетімді бағадағы азық-түлікке молынан кенелді. Берекелі шара шеңберінде сырдариялықтар халыққа сапасы жоғары, табиғи таза өнімдерін ұсынды.

Жәрмеңкеде аудан өнерпаздары әннен шашу шашып, мерекелік көңіл-күй сыйлады.