Арқадағы ағайынға Сырдың берекелі тартуы

Күз – берекеге толы мол­шылық мезгілі. Бұл шақта ерте көктемнен қамданған егінші қа­уым еткен еңбегінің нә­тижесін көріп, қам­баны астыққа толтырады, өнімді молынан жинайды. «Елде болса, ерінге тиеді» демекші, сол жи­­налған мол өнімде жұрт­шылықтың ризық-не­сі­бесі бар. Егіншінің мәрт­­тігінен көпшілік тәт­­­тіден дәм татады, қыс­­тың қамын жасайды. Мұн­­дайда елге жәрмең­ке­нің пайдасы көп.

Қыркүйек айының екінші сенбі-жексенбісінде Елорда жұртшылығы ерекше қуанышқа кенелді. Жыл са­йын Арқа төрінде молшылық мерекесін жасайтын Сыр жұртшылығы бұл жолы да үрдісті істі жалғады. Облыс әкімдігінің ұйымдастыруымен қыр­күйектің 10-11 күндері Нұр-Сұлтан қаласында ауыл шаруашылығы өнім­дерінің жәрмеңкесі өтті. Сыр ең­бек­керлерінің мол өнімін асыға күт­кен Елорда тұрғындары «Тұран» даң­ғылының бойында орналасқан «Астана Арена» стадионының жанында екі күн бойы қызу сауда жүргізіп, қысқа дайындықты қамдап алды.

Жалпы, бас қалаға аймақтың 70-ке жуық ауыл шаруашылығы тауарын өндіру­шілерден 50 жүк автокөлікпен жалпы құны 200 млн теңгені құрайтын 500 тоннадан астам өнім жеткізілді. Атап айтқанда, жәрмеңкеге 100 тонна күріш, 15 тонна ет және 30 тонна балық өнімдері, 80 тонна көкөніс пен жеміс-жидек, 210 тонна бақша өнімдері, 50 тонна асқабақ, 3 тонна ас тұзы, 10 тонна сүт өнімдері, 5 тон­наға жуық кондитер өнімдері астана жұртшылығына нарық бағасынан арзан ұсынылды.

– Елімізде әлеуметтік маңызы бар тауарлардың бағасын өсірмеу үшін үлкен жұмыстар жасалып жатыр. Бұған қатысты Мемлекет басшы­сы елге қолжетімді бағамен азық-түлікті сату бойынша нақты тапсырма берген. Соған орай Сыр елінің ең­беккерлері ауыл шаруашылығы өнімдерін Нұр-Сұлтан қаласына әке­ліп, ұсынып жатыр. Түрлі өнімдерді нарық бағасынан 20 пайызға дейін арзанға сатып жатырмыз. Биыл облыс диқандарына су тапшылығын болдырмау мақсатында мемлекетаралық деңгейде жүйелі жұмыстар жүргізілді. Соның арқасында аймақ еңбеккерлері жақсы өнімге қол жеткізуде, – деді облыс әкімінің орынбасары Серік Қожаниязов.

Отандық өнімді қолдауда мұндай игілікті іс-шараның маңызы зор. Өйткені, қазір қымбатшылық қос бү­йірден қысып тұрғанда арзан баға тұрғындар қалтасына қолайлы. Мұ­ның бағаны тұрақтандыруға да сеп­тігі бар. Сондықтан осындай жәр­мең­келер халықтың әлеуметтік жағ­да­йына көп көмегін тигізеді.

Жәрмеңкеде күріш, балық, көк­өніс пен жеміс-жидектерге, қауын, қарбызға, сүт өнімдерінің түрлері яғни, құрт, ірімшік, шұбат өнімдеріне сұраныс жоғары болды. Әсіресе, Сыр­дың басты дақылы саналатын – күрішті күткендердің қарасы қа­лың екені белгілі. Сондай-ақ бақша дақылдары, оның ішінде қауын-қар­бызды алушылар қатары көп. Өңірден жеткен балыққа да сұраныс жоғары болған.

Елорда төріндегі жәрмеңкеге аудан әкімі Мұрат Ергешбаев арнайы барып қатысты. Ауыл шаруашылығы жәрмеңкесінің жоғары деңгейде ұйым­дастырылуына сырдариялық ең­беккерлер де зор үлес қосты. Атап айтар болсақ, ауданға қарасты Бес­арық ауылынан 20 тонна ақ күріш, Іңкәрдариядан 13,5 тонна қауын-қар­быз, Қоғалыкөлден 100 литр қы­мыран ел астанасына жеткізілді. Мұнда Іңкәрдария топырағына егіл­ген «Әміре» қауынын сұраушылар қа­та­ры жиілеген.

Екі күнге созылған жәрмеңкеден керегін қамдап алған астаналықтар Сыр еңбеккерлеріне зор ризашылығын жеткізді. Ұйымдастырылған іс-шараға алғыстарын білдіріп, Арқа жұртына берекелі тарту жасағандарына дән риза екендіктерін білдірді.

Айта кетейік, жәрмеңке барысында облыс тарапынан қайырымдылық қоры аясында жағдайы төмен отба­сыларға азық-түлік себеттері таратылды. Сондай-ақ Сыр елінен барған өнерпаздар елордалықтарға әсерлі кө­ңіл-күй сыйлады.

Ердос БЕРКІНБАЕВ