Тіршілік тынысы Tirshilik-tynysy.kz ақпараттық агенттігі
» » Қыстың қамын жаз ойла

Қыстың қамын жаз ойла

Таңертеңнен дорбасын арқалаған көпшілік Терең­өзек кентіндегі А.Әлиакбаров көшесіне ағылды. Себебі, жылдағы дәстүр бойынша азық-түлік өнім­дерінің жәрмеңкесі басталған болатын. Аудан тұрғын­дары мен қонақтарына арналған жәрмеңке әлеуметтік маңызы бар азық-түлік бағаларын тұрақтандыру мақ­са­тында ұйымдастырылды.

«Байқоңыр» ӘКК» АҚ-мен жергілікті тауар өндіру­шілердің қатысуымен жүзеге асырылған жәрмеңкеде тұрғындар белсенділік танытты. Ала жаздай тынбай еңбек еткен шаруалар азық-түлік өнімдерін аудан хал­қына нарық бағасынан төмен бағада ұсынды. Бүгінде ауыл шаруашылығы өнімдеріне тұрғындар тарапынан едәуір сұраныс артқан. Сондықтан сала мамандары 30 түрлі өнімді сатылымға шығарды. Бірнеше сағатқа созылған жәрмеңкеге 45 тонна өнім әкелінген.

– Жыл көлемінде «Байқоңыр» ӘКК» АҚ-мен бір­лесіп, біршама жәрмеңке өткізілген болатын. Бүгін­де жаз бойы егін еккен шаруалар өнімдерін жинау­ға кірісті. Биыл көкөніс пен бақша өнімдерін егуге арналған ауыл­­­­­­­дардан арнайы жер ашылды. Тұрғын­дар картоп, жуа, сәбіз, қауын-қарбыз секілді ауылшаруа­шылық өнімдеріне баса назар аударды. Мол өнім алуға ниетті диқан қауымның қатысуымен алдағы уақытта жәрмеңкені көптеп өткізу жоспарда бар. «Қыстың қамын жаз ойла» деген тәмсіл бекер айтылмаса керек-ті. Қырық мыңға жуық аудан халқы қыс маусымына дайындықты пысықтағаны жөн, – деді аудандық ауыл шаруашылығы бөлімінің басшысы Н.Жұмабеков.

Өз кезегінде жәрмеңкенің өту барысы жайында жер­гілікті тұрғынның пікірін білген едік.

– Қазіргі уақытта азық-түлік бағасы біршама кө­те­ріл­генін байқаймыз. Қарапайым отбасында жан басы көп болғандықтан кез келген тамақтың шақ келмейтіні анық. Халық қалтасын жұқартпау үшін арзан бағада жәрмеңке ұйымдастыру маңызды рөл ойнайды. Бір жағынан жәрмеңке – азық-түлік тапшылығын бол­дырмаудың бірден-бір жолы. Жәрмеңке барысында сапалы, уақытылы піскен жергілікті өнімдерді кезіктірдік. Қажетімізге жарайтын азық-түлікті сатып алдық. Сау­­да жасауға келген халықтың қарасы қалың болды. Әркім өзіне керекті тауарды алды деп ойлаймын, – дейді кент тұрғыны Б.Жарықбасова.

Балтабай ОРДАБЕКОВ 
30 тамыз 2022 ж. 487 0