Еңбек адамына құрметтің ерекше үлгісі

Жақында аудан әкімі М.Ергешбаев­пен бірге Нағи Ілиясов ауы­­лын­да­ғы­ «Мағжан және К» серік­тес­тігінің егін­ге орақ салу рәсіміне қа­тыс­қан бола­тынбыз. Сонда ауыл ақ­са­қалда­рымен, егіншілермен кезде­су­­дің сәті түсіп, елді мекеннің тыныс-тір­шілігі, даму белестері жөнінде әң­­гі­­­­­ме өрбіт­кен едік. Кездесу барысында ауыл орта­лы­ғынан «Егіншілер аллеясының» салы­нуын ауыл халқының жақсылыққа ба­лап, жү­йелі жұмысты жоғары бағалап жат­­қанын аңғардық.

Жалпы, Нағи Ілиясов ауылы – республикадағы үздік елді мекен. Үздік ауылдағы үлгілі істерді біз бұған дейін де аудандық газетте бірнеше рет жариялап, кеңінен на­сихаттаған болатынбыз. Ал бұл жолы еліміздің бірде-бір өңірінде жоқ жаңа аллея туралы жазуды жөн көрдік. Әрине, аллея құрылысы біткен соң да жазуға болар еді. Бірақ іргелі ауылдағы көз сүйсініп, көңіл марқайтар ілкімді іске деген халықтың ықылас-ниеті қолға қалам алуымызға түрткі болды. Мәселен, ауылдық ардагерлер кеңесінің төрағасы, «Сырдария ауданының Құрметті азаматы» Төребек Жұмабекұлы жаңа аллеяны еңбек адамына құрметтің ерекше үлгісі деп қабылдайтынын айтты.

– Халқымызда «Еңбек – әлемнің әміршісі» деген даналық сөз бар. Бәрі де еңбекпен келеді, еңбектенген адамға бақыт басын иеді. Бір қызығы, еңбек адамына арналған ескерткіш еліміздің ешбір аймағында жоқ екен. Осыны ескерген ша­руашылық жақсы істі қолға алып, демеушілік аясында жаңа аллея салып жатыр. Жақында аллея жұмысымен облыс әкімі Нұрлыбек Машбекұлы танысып, көріп кетті. Жыл соңына дейін пайдалануға берілетін аллея болашақта ауыл­дың ажарын ашатын орталық болмақ. Ең бастысы, бұл – адал еңбекті ту еткен қарапайым еңбек адамына құрмет көр­сетудің нағыз үлгісі, – дейді Төребек Жұмабекұлы.

Қадірлі қарияның сөзін ауылшаруашылық саласының ардагері Кенжебек Анафияев қуаттай түсті.

– Мемлекет басшысының соңғы Жолдауында еңбек адамына құрмет көрсету, оларды көпшілікке үлгі ету жөнінде жақсы айтылды. Президент «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Біз қарапайым еңбек адамына құрмет көрсетуіміз керек» деп ерекше атап өтті. Негізі қандай кәсіппен айналыссаң да, оны сапалы атқару аса маңызды. Сондай-ақ өз саласының шеберіне әрдайым сұра­ныс болады. Ең бастысы, адал еңбек екенін жете түсінетін ұрпақ тәрбиелеуге тиіспіз. Ауылдағы аллея осындай жұмыс­тардың бастамасы болады деп сенемін, – дейді Кенжебек Анафияев.

Мақаланы жазу барысында Қазақстанның Еңбек Ері Абзал Ералиевпен телефон арқылы пікірлестік. Жерлес­тер мақтанышына айналған жанашыр азамат аллеяның құры­лыс жұмыстарын жыл соңына дейін аяқтау жоспарланғанын жеткізіп, жұмыс толық біткенде ауыл орталығының сәніне сән қосылатынын ерекше тебіреніспен жеткізді.

Ауылды жан-жақты түлетуге, көркейтуге ерекше еңбек сіңіріп, қол­дау біл­ді­ріп келе жатқан «Абзал және К» толық серік­тестігі мен «Мағжан және К» жауапкершілігі шектеулі серіктестігі екенін айтып өтуіміз қажет. Лайым, үздік ауыл­­­­­да үлгілі істер көп болып, елді мекеннің кескін-келбеті көрік­тене берсін!

Ақтөре ИБРАГИМҰЛЫ