Тіршілік тынысы Tirshilik-tynysy.kz ақпараттық агенттігі
» » Тікелей сауал жолдап, тиісті жауап алды

Тікелей сауал жолдап, тиісті жауап алды

Апта басынан аудан әкімі Мұрат Ергешбаев елді мекендерді аралап, тұр­ғындардың талап-тілегін тың­да­ды. Қасына сала басшыларын бірге ертіп, ауыл халқын мазалаған мәсе­лелер бойынша сұрақтарына жауап берді. Бұл жолғы кездесулер бұ­рын­­­ғыдан өзгерек. Олай дейтініміз, ха­лықпен кездесу ғимарат ішінде емес, ауыл орталықтарында өткізілді. Және де арнайы регламент емес, кез келген тұрғын аудан басшысына ті­келей са­уал­ын жолдап, тиісті жауап алды.

Кездесулерде аудан басшысы алдымен ауданның әлеу­меттік-экономикалық даму көрсеткіштеріне тоқтал­ды. Ауданға қарасты әрібр ауылда қандай жобалар, жұ­мыстар жасалып жатқандығын тілге тиек етіп, кез келген мәселеде ашықтық саясаты қолданылатынын жеткізді.

– Мемлекет басшысы Қасым-Жомарт Тоқаев Жолда­уында халықпен тығыз байланыс орнату бойынша нақ­ты тапсырмалар берді. Біздің алдымызда атқарылуы тиіс ауқымды міндеттер тұр. Оның барысында екі басты қағиданы қолдану қажет: әділеттілік пен ашықтық, – деді аудан әкімі.

Елді мекен тұрғындары әлеуметтік мәселелерді қоз­ғап, ұсыныстарын білдірді. Айдарлы халқы білім беру жә­не әлеуметтік саладағы негізгі проблемаларды көтерді. Ал Жеткіөл мен Аманкелді ауылында аяқ су, облыстық маңызы бар «Қызылорда – Айдарлы» автожолын күрделі жөндеуге қатысты ұсыныстар айтылды.

Бесарық ауылында жоспарлы инфрақұрылымдық жұ­мыстар жүргізілуде. Елді мекенде ұзындығы 8,4 шақы­рымды құрайтын 6 көше орташа жөндеуден өткізілуде. Оған қоса 380 млн теңгеге жаңадан спорт кешенінің құрылысы салынуда. Қоғалыкөлде 58,1 млн теңгеге Тілеу ұста және Қ.Сәтбаев көшелеріне орташа жөндеу жұмыстары жүргізілуде. Сонымен бірге «Қызылорда – Қоғалыкөл – Шіркейлі» автомобиль жолына жөндеу жұмыстары атқарылуда. Бұл жұмыстардың сапалы жү­руін ауылдың қауымдастық кеңесінің мүшелері өз ба­қы­лауына алған. Одан бөлек тұрғындар тарапынан жер мәселесі, ойын алаңдарын салуға қатысты сауалдар қо­йылды.

Шіркейліліктер ауылдағы Бейбітшілік және Қожам­жаров көшелеріне жөндеу жұмыстарын жасау, дәрі­герлік амбулаторияны күрделі жөндеуден өткізу жө­нінде ұсыныстарын айтты. Ал үлгілі ауыл Н.Ілиясовта тұр­ғындардың аудан басшысына деген сұраулары кә­сіп ашу және оған қаражат тарту төңірегінде болды. Жеңіл­детілген несиелер алу, қайтарымсыз гранттар бойынша ұсыныстарын жеткізді.

Шаған ауылында жиналған жұртшылық түйіткілді мә­се­лелер бойынша, нақты айтқанда көше жөндеуі, жарық мәселесі, толғандырып жүрген жер мәселесі тө­ңірегінде талап-тілектерін білдірді. Іңкәрдариялықтар болса аяқ су мәселесін қозғады. Бұл ауылдың халқы мал шаруашылығы және бақшалық егінмен айналысатын бол­­ған соң, аяқ судың келуіне байланысты ұсыныстарын айтты.

Тіректі ауыл Ақжармада да елді мекен тұрғындары көкейдегі сұрақтарын қойды. Атап өту керек, бүгінде Ақ­жарма ауылының бірнеше көшелері жарықтандырылып, 186,7 млн теңгеге ұзындығы 6,2 шақырымды құрайтын Ысқақов, Аукенов, Балапанов, Омаров, Садық ахун көшелеріне орташа жөндеу жұмыстары жүргізілуде. Қалжан ахун ауылындағы кездесуде көпшілік аяқ су жет­кізу және электр желілері, көше жөндеу, ауылдық дәрігерлік амбулаторияның күрделі жөндеу мәселелері төңірегінде талап-тілектерін жеткізді. Сондай-ақ С.Сей­фул­лин және А.Тоқмағамбетов ауылының халқы жер мәселесіне қатысты мәселелерді көтерді.

«Сұрақ-жауап» форматында өткен кездесулерде аудан әкімі М.Ергешбаев барлық мәселе ескерусіз қалмай, бақылауда болатынын айтты. Ауыл тұрғындарының кәсіп ашуға деген ынтасына ризашылығын білдіріп, тиісті сала басшыларына ауыл тұрғындарына толық түсіндірме жұмыс­тарын жүргізуді тапсырды. Сондай-ақ кезек күттір­мейтін мәселелер бойынша нақты іс-шаралар­ды қолға алуды тиісті сала басшыларына және ауыл әкімдеріне жүктеді.







Ердос БЕРКІНБАЕВ






21 мамыр 2022 ж. 180 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам