Балғындар ордасы – Нұ р б ө б е к

Биылғы жыл еліміз үшін, балалар үшін маңызды. Ел Президенті 2022 жылды балалар жылы деп белгіледі. Сондықтан балғын­дарға ай­рықша мән бере­тін жылда аудандық басылым бетінде балабақ­шалар жұмысын на­сихат­тайтын арнайы айдар ашыл­­ғанын жазған болатынбыз. Бүгінгі мақаламыз кент орталығы­н­дағы №13 «Нұрбөбек – Терең­өзек» балабақшасына арналады.

Мектеп жасына дейінгі балаларға тәлім-тәрбие беру – балабақшаларға жүктелген міндет. Тәрбиешілер еліміздің ертеңі – ұлт бола­шағын тәрбиелеуде. Балғындардың бо­йына адамгершілік құндылықтарды сіңі­руге атсалысып келе жатқан балабақша ұжымын бүгінде білікті маман Гүлдана Асықбаева басқарады.

Кент орталығынан 2010 жылы пай­далануға берілген жаңа балабақшаның ғима­раты көне ғимаратты күрделі жөндеуден өткізу негізінде ыңғайландырылды. Тозы­ғы жеткен ескі ғимарат әуелгі баста Тұр­мыстық қажетті өтеу комбинаты болған. Тоқырау заманының ығына жығылып кеткен мекеме көп жыл тоз-тозы шығып, халыққа қызметін біржолата тоқтатып, қызметкерлері тарап кетті. Жергілікті би­лік қолданыстан шығып қалған осындай ғимараттарды халыққа қажетті мекемеге айналдыру қолға алған кезде еңселі ғи­маратты балабақшаға ықшамдауды жос­парлады. Кенттегі балабақшалардың санын көбейту мақсатында, сондай-ақ балабақша кезектілігін азайту үшін 50 орындық бал­ғындар мекені аз уақыттың ішінде есігін айқара ашты.

Шын мәнінде қазір көркі көз тартатын ғимаратқа қарап сол кездегі бастаманың сәтті болғаны көрініп тұр. Дегенмен бала­бақшаның бой көтеруіне, басынан аяғына дейін атсалысқан білікті педагог, ардақты ұстаз Зәуре Момынованың қосқан үлесін әріптестері жақсы біледі. Тәжірибелі басшы құжаттардан бастап, күрделі жөн­деудің сапалы атқарылуын қадағалады. Ұзақ жыл ұстаздық қызмет атқарған, балаларға білім мен тәрбие берген ардақты жан қазір зейнет демалысына шықты.

Қайта жаңғырудан өткен қос қабатты ғимараттың бірінші қабатында мамандарға арналған жұмыс бөлмелері бар. Әдіскер, психолог, логопед, есепші, меңгеруші, шаруа­шылық бөлмесі, асхана, кір жуу жұмысы осын­да атқарылады. Екінші қабаттағы екі топқа лайықтандырылған ойын бөлмесі, жатын бөлмесі, тазалық бөлмесі санитарлық талапқа сай жабдықталған. Кең, әрі ыңғайлы етіп жасалған бөлмелерде бүлдіршіндер таңертеңнен бастап, кешкі уақытқа дейін тынығып, мезгілімен тамақтанып, ойнайды, тәрбиешілерден тәлім алады.

– Балабақша тізгінін ұстағаныма екі жыл болды. Осы ғимараттың күрделі жөн­деу­ден өтіп, ұжымның қалыптасуына атсалыстым. Зәуре апайдың балабақшаның қалыптасуына қосқан үлесі зор. 12 жылдан бері балабақша балғындарға тәлім-тәрбие беруде. Өткен жылдың соңында ғимарат табиғи газға қосылды. Бүлдіршіндерді күн сайын құрақ ұша қарсы алатын тәрбие­шілермен қатар басқа да арнайы мамандар бар, – дейді балабақша меңгерушісі Г.Жетпісбайқызы.

Тұрғындар арасында «Нұрбөбек» аталып кеткен балабақшада қазір 3-5 жас аралығындағы 50 бала тәрбиеленуде. Балалар «Балапан» және «Қарлығаш» топтарына бөлінген. Түске дейінгі уақытта тәрбиешілер ұйымдастырылған оқу қызметін ұсынады. Ал түстен кейінгі мезгілде белгіленген кес­теге сай әуез жетекшісі, логопед, психолог мамандар балалармен жұмыс жасайды. Түрлі қимыл-қозғалыс ойындары ұйым­дастырылып, шығармашылық, ден­сау­лық, айналамен танысу бағыттары бойынша сабақтар өткізіледі. Мерекелік іс-шараларға дайындықтар жүргізіліп, балалар ертеңгілікте тақпақ айтып, ән айтып, би билеуге үйренеді.

– Бір жылдан бері балабақшада логопед маманы жұмыс істей бастады. Балалар үшін өте қажетті маман. Қазір балалардың тілі кеш шығады. Мұны мамандар баламен тығыз қарым-қатынас орнамағанның сал­дары деп түсіндіреді. Ұялы телефонға телмірген бала айналысындағы әлемнен бейхабар күйде жүреді. Сондықтан бала денсаулығында кінәрат пайда болады. Психолог, логопед мамандар бүлдіршіндермен жұмыс жүргізіп, тілдегі ақауды ерте анық­тауға және қалпына келтіруге көмек­теседі. Кейде ата-аналар тарапынан түсініс­пеу­шіліктер болады. Бірақ баланың дұрыс жетілуін қадағалайтын маманға сенген дұрыс. Қандай да болсын кемшілікті ерте кезден анықтау жақсы нәтиже беретіні сөзсіз. Балабақшада «Баланың сөйлей алмау себептерін анықтау» тақырыбында өткен семинарда мамандар өзара тәжірибе алмасып, пікірлесті, – дейді әдіскер Г.Исабаева.

ҚР Білім және ғылым министрлігі бе­кіт­кен мектепке дейінгі тәрбие мен оқытудың үлгілік оқу бағдарламасын негізге алып жұмыс жасайтын тәрбиешілер оқу қызметін барынша ықшам, бала тіліне түсінікті, ың­ғайлы, әрі қызықты етіп өткізуді жоспарға енгізген. Балабақшадағы педагог-сарапшы Г.Нұрмаханова, педагог-модератор Г.Иса­бае­ва, С.Қонаева тәжірибелі мамандар. Үлгілі тәрбиешілер үнемі бала тәрбиелеудегі үздік тәжірибелерімен бөлісіп отыруға ма­шық­танған. Бүлдіршіндердің танымдық қа­білетінің шыңдалуына, қайырымды, кі­ші­­пейіл, қамқор болуға үйретуде тың тә­сіл­дерді қолданып отырады.

Жыл бойы атқарылған жұмыстың нәти­жесі ретінде тәрбиешілер жетістікке жетуде. Сонымен қатар жас маман Н.Утеулиева, психолог Ғ.Раманқұлова, әуез жетекшісі Н.Маханбетжанованың еңбектерін ерекше атауға болады. Сөзімізге дәлел ретінде бала­бақшаға қатарынан 2-3 баласын әкеліп жүр­ген ата-аналардың жақсы пікірін айтуға болады. Олар Жансая Назарова мен Гүлжан Құлмағанбетова.

– Көп балалы анамын. «Нұрбөбек» бала бақшасына үшінші балам келеді. Алдың­ғыларым да осы балабақшада болған. Құ­дай қаласа кішкентайларымды да кезекке қойдым. Маған ұнайтыны тәрбиешілердің кішіпейілділігі, балалардың тілін тауып жұ­мыс жасауы. Әсіресе Назым апайымыз жы­лы қабақпен, басынан сипап, айнала­йын деп күтіп алады. Кешке баламызды алып кетуге келгенде апайларымен қимай қош­тасады. Баламыз мезгілімен демалып, тамақтанып, өнерге үйренуде, – дейді кент тұрғыны Жансая Назарова. Осындай жылы лебіз білдірушілердің қатарында Гүлжан Құлмағанбетова да бар. Көп балалы ана бала бақшаға төртінші перзентін әкелуде. Жан жақты болып өсіп келе жатқан балақайдың бала бақшадағы жетістігіне ана дән риза.

Жыл сайын 20-23 баланы мектепке шы­ғарып салатын балабақша тәрбиешілері әр­бір балғынның ата-анасынан сауалнама алады, айтқан пікірлерін жұмыс барысын­да ескереді. Баланың даму деңгейін қалып­тастырып, болашаққа нық қадам басуына атсалысып келе жатқан ұжымның әрбір қызметкерінің өзіндік орны бар.

Бибісара ЖАНӘЛІ