Кездесуге құрметті қонақ ретінде «Сырдария ауданының Құр­метті азаматы», ҚР «Мәдениет саласының үздігі» төсбелгісінің иегері Жәнібек Маханбет, ҚР «Білім беру ісінің үздігі», «Мәдениет саласының үздігі», «Сырдария ауданының Құрметті азаматы» Сансызбай Сәдуақасов, еңбек ардагері, қолөнер шебері Алтын Нұртаева, «Сырдария аграрлы техникалық колледжінің» оқу өндірістік ұстазы Алтын Қожақова, таланты сазгер, мәдениет саласының майталманы Марат Қошық шақырылды.

Тағылымға толы кешті №131 Талғат Қозыбаев атындағы орта мектептің директоры Айнұр Әлиева ашып берді.

– Жыл көлемінде мектебімізде танымдық іс-шаралар жиі ұйымдастырылып келеді. Ұстаздарымыз әрбір пән апталықтары аясында өзара тәжірибе алмасуда. Бүгінгі кеш барысында мұғалімдер мен оқушылар өмірі ғибратқа толы шығармашылық ие­лерінің жұмысымен танысатын болады. Үлкендеріміз бастаған істі кішілеріміз қос­тайтынымыз анық. Аудан мерейін асқақ­татып жүрген аға-апаларымыз еңбе­гімен елге танылған. Олардан рухани құн­­дылықтар жайында мол мағлұмат алуға зор мүмкіндік алып отырмыз. Әлі де шығар­ма­шылық иелері қазақтың өнерін дамыту үшін барын салады. Жас ұрпаққа құнды жәдігерлерімізді тұрақты түрде дә­ріп­теуіміз керек, – дейді А.Әлиева.

Танымдық кездесудің қонақтары жинал­ған көпшілікке өз шығармашылықтары жөнінде кеңінен айтты. Музыка, қол өнер, тігін, сурет өнерінің қыр-сырына қаныққан жандар өмірлік тәжірибелерімен бөлісті. Қазақтың ертеден келе жатқан құрақ құрау, ән айту, мүсін жасау, тігін тігудегі өзіндік ерекшеліктер жайында сөз қозғалды. Білік­тілігі жоғары жандар жекелей сөз алған тұста өз мамандықтарының майталманы екендіктерін байқатты. Кәсіби шеберлікті сан қырынан сараптай білді.