72 жас маман қоныс тойын тойлады
Жас мамандардың үйлі болуына «Дипломмен – ауылға» бағдарламасы арқылы зор мүмкіндік жасалуда. Өткен жылы мемлекеттік бағдарлама шапағатын көрген жас мамандар жаңа отаудың иесі атанды.Негізінен, «Дипломмен – ауылға» мемлекеттік бағдарламасы елімізде осыдан 13 жыл бұрын қолданысқа енгізілген. Аталған жобаның мақсаты – ауылдық жерлерде жұмыс істеуге келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен саласының жас мамандарын ынталандыру болып табылады. Аудан жастарының баспаналы болуына жол ашатын жоба бүгінде өз тиімділігін көрсетті. Көптеген жас маман бағдарлама бағытымен ауылдық жерлерге жұмысқа орналасып, бүгінде елді мекеннің тұрғылықты тұрғындарына айналды.
Аудандық экономика және бюджеттік жоспарлау бөлімінің мәліметінше, өткен жылы аудан бойынша 105 маманға көтерме жәрдемақы берілген. Мамандардың жәрдемақысына бюджеттен 60293,0 мың теңге қаржы бөлінген. Сонымен бірге олардың тұрғын үй сатып алу үшін бюджеттік несиеге 306285,0 мың теңге қаржы қаралған. Соның негізінде былтыр мемлекет тарапынан бөлінген қаржы есебінен ауданда 72 маман қоныс тойын тойлаған. Айта кетейік, көтерме жәрдемақы мен тұрғын үй сатып алу үшін бөлінетін бюджеттік несие мөлшері де жылдан-жылға өсуде.
– Жас мамандардан құжаттарды қабылдау және оларға мемлекеттік қызмет көрсету мемлекеттік корпорация арқылы немесе электрондық форматта «Электрондық үкімет» веб-порталы арқылы кезек тәртібімен жүзеге асырылады. Бүгінде жас мамандардың құжаттарын қабылдау жұмыстары жүргізілуде. Аудандық экономика және бюджеттік жоспарлау бөлімі тарапынан бағдарламаға қатысушыларға тұрғын үй алу заңдылығы түсіндіріліп, жан-жақты бағыт-бағдар беріледі. Мемлекеттік бағдарламаның заңдылығы бойынша несие алған азамат жақын туыстарының үйін ала алмайды. 2022 жылға көтерме жәрдемақының мөлшері 100 АЕК мөлшерімен есептеліп, бір маманға 306300 теңге қаржы берілетін болады. Яғни биыл 80 маманға 24504,0 мың теңге көтерме жәрдемақы төленеді. Қаржыландыру сәуір айынан басталмақ. Ал тұрғын үй сатып алу үшін берілетін несие бойынша 54 маманға 248103,0 мың теңге қаржы бөлінді. Тұрғын үй сатып алу үшін берілетін бюджеттік несие көлемі әр маманға 4 млн 594 мың 500 теңге болып бекітілген, – дейді аудандық экономика және бюджеттік жоспарлау бөлімінің әдіскері Сансызбай Сейлов.
Аудан орталығындағы №35 Иса Тоқтыбаев атындағы мектеп-лицейдің ағылшын тілі пәнінің мұғалімі Жансая Қорғанбай – мемлекет қолдауының арқасында жеке тұрғын үйге қол жеткізген сырдариялық жас мамандардың бірі.
– Менің жарым – Наурызбай Раппазадаев көпбалалы отбасынан шыққан. Екеуміздің отасқанымызға 5 жыл болды. Қазіргі таңда екі ұлдың ата-анасымыз. Былтыр жас маман ретінде тұрғын үй алу үшін жергілікті атқарушы органға құжаттарымды тапсырдым. Соның негізінде өзіміз қалаған тұрғын үйге қол жеткіздік. Жолдасым энергетика саласында қызмет етсе, өзім өскелең ұрпақты білім нәрімен сусындатып келемін. «Дипломмен–ауылға» мемлекеттік бағдарламасының жас мамандардың өмірден өз орындарын табуы үшін септігі көп. Біз бағдарлама бағытымен баспаналы болғанымызға қуаныштымыз, – дейді жас ұстаз.
Балтабай ОРДАБЕКОВ
