Ақиық ақын Асқар ауылында тұрғындар ертелетіп әз-Наурыз мерекесі аталып өтілетін орталық алаңға асықты. Мұнда бір киіз үй, бір палатка тігіліп, алаң сахнасы мерекеге сай безендірілген. Мерекелік көңіл-күйдегі жұртшылық бір-бірімен құшақ айқастырып, бір-біріне жақсы тілектерін арнап жатты.
Мерекеде ауыл ардагерлері Д.Сұлтанов, П.Әлиакбарұлы, ауыл әкімі Ғ.Алданазаров, шаруашылық директоры М.Есжанов құттықтау тілектерін білдірді. Мерекенің өн бойында әсем ән шырқалып, қазақтың салт-дәстүрлерінен көріністер көрсетілді. Ұлыстың Ұлы күнінің өз дәрежесінде өтуіне ауылдағы барлық мекемелер белсенді атсалысты. Шаруашылық директоры М.Есжанов 2017 жылғы егіннің нәтижесі бойынша 10-12 адамға қосымша еңбекақысын салтанатты жағдайда табыс етті. Осы орайда биыл озаттар саны 50-60 құрайтынын атап өткен орынды болмақ. Олар миллиондаған қосымша ақы алып, еңбектерінің зейнетін көруде.
Шаруашылық пен ауыл әкімдігі ұйымдастырған шарада ұлттық ойындар да жақсы көрініс тапты. Әз-Наурызда аудандық аурухана бас дәрігерінің орынбасары Дархан Қалымбетов жерлестерін мерекемен құттықтап, «Қазақ баласы» әнін орындады. Сондай-ақ мектеп директоры Қ.Омаров Павлодар қаласында жасөспірімдер арасында қазақша күрестен өткен республикалық біріншілікте күміс жүлдені еншілеген мектеп шәкірті Ерсұлтан Қошқаровты марапаттады.