Іңкәрдарияда мешіт ашылды

Соңғы бір айда Сырдария ауданында екі мешіт ашылды. Біз бұ­ған дейін Жетікөл ауылында мешіттің пайдалануға берілгенін хабар­лаған болатынбыз. Бұл жолы көпшілік Іңкәрдария ауылында руханият ордасының лентасын қиды. Ашылу салтанатына Қазақстан мұсылмандары діни басқармасының Қызылорда облысы бойынша өкіл имамы Болатбек Абуов, аудандық ішкі саясат бөлімінің бас­шы­­сы Бейбіт Смайлов, аудандық мұсылмандар мешітінің бас имамы Асхат Асқаров, ауыл әкімі Сәулет Есдәулетов, «Ақжарма және к» фермерлік қожалығының төрағасы Қайрат Нұрсейітов, еңбек ардагерлері Рахымжан қажы Бәйменов, Мектепхан Елеусінов, Жұматай Қасымов, ауылдық ардагерлер кеңесінің төрағасы Әбдіразақ Байманов, Сыр өңірінің имамдары мен ауыл тұрғындары қатысты.

Іңкәрдария ауылындағы 100 орынға арналған мешіттің құрылысы өткен жы­лы басталған. Ауылдан түлеп ұшқан кәсіп­кер, қажы Мейрамбек Қонақбаевтың демеу­шілігімен жаңа ғимарат тұрғызылды. Бұдан бөлек, өңірімізге белгілі кәсіпкерлер Асхат Шәукенбаев, Қазыбек Омаров, Мұхтар Шаханов, Бахтияр Құдайбергенов қар­жылай қолдау көрсеткен. Сонымен бірге, ауыл азаматтары Бақытбек Шәріпбаев, Жомарт Базарбаев, Мұрат Тыныштықбаев, Жыл­қыбай Исабаев, Абзал Нұрылдаев, Мұрат Жөнеров, Кенжебек Манатауов сынды азаматтар игілікті істің басы-қасынан табылды. Іс-шарада әруақтарға Құран бағыш­талды. Қазақстан мұсылмандары діни бас­­­қар­­­­­масы­ның Қызылорда облысы бо­йынша өкіл имамы Болатбек Абуов құтхана мешіт салу­ға зор үлес қосқан ел азаматтарына ризашы­лығын білдірді.

– Аудан орталығынан шалғайда орна­ласқан Іңкәрдария ауылында жаңа ме­шіттің ашылуының куәгері болып отырмыз. Жақсылыққа үн қосқан ел азаматтарының Алла Тағала ырзық-несібесін молынан бер­сін. Құлшылық үйін салуда айрықша қолдау көрсеткен ел азаматтары сауапты іске себепкер болды. Мұнда қанша ұрпақ діни сауаттанып, Тәңірдің ризашылығына бөленеді. Жаңа нысан баршаңызға құтты болсын, іші жамағатқа толсын, – деді өкіл имам Болатбек Абуов. 

Жаңа мешітте 100 ер кісіге арналған бөлме, 20 әйел кісіге арналған бөлме, 15 орынға арналған медрессе, ауыл има­мы­ның бөлмесі, 100 орындық асхана, тамақ пісіретін және мал соятын бөлмемен қам­тылған. Игілікті іс-шарада мешітті салуға атсалысқан жандарға құрмет көрсетілді. Ауыл әкімі Сәулет Есдәулетов пен ауылдық ардагерлер кеңесінің төрағасы Әбдіразақ Байманов сөз сөйлеп, ауыл тұрғын­дары­ның атынан ризашылығын біл­дірді. Де­меу­шілерге сый-сияпат ұсын­ды. Ал «Ақжарма және К» фермерлік қожа­лығының төрағасы Қайрат Нұрсейітов ауыл мешітіне 1 миллион теңге қаржылай көмек көрсетті. Тыл ардагері Рахымжан қажы Бәйменов көпші­лікке ақ батасын берді. 

Іс-шара соңында әруақтарға арналып ас берілді. Сонымен бірге, көкпардан жарыс өткізілді.

Балтабай ОРДАБЕКОВ