Үйге газ орнату қалтаға салмақ түсіре ме?

Аудан орталығына көгілдір отын берілгелі 3 ай өтті. Осы уақыт аралығында Тереңөзек кентінің ұрғындары үйлеріне газ орнатып, игілігін көруде. Бүгінгі таңда кент бойынша 372 тұрғын үй мен 8 әлеуметтік нысан көгілдір отынға қосылған. Осы ретте, газға қосылу қалтаға қаншалықты салмақ түсіретінін таразылап көрелік.

Жобадан қалып қойған үйлерге газ құбыры жетеді

Негізінен, Тереңөзек кентін газдандыру жұ­мыстары 2019-2020 жылдары ат­қа­ры­лып, 2021 жылдың 1 ақпанында пай­да­­ла­нуға берілген болатын. Жобаның құны 2 152,9 млн. теңге. Жоба бойынша 11,5 ша­қырым жоғарғы қысымдағы, 85,2 шақы­рым орташа қысымдағы жерасты газ құбыр­лары жүргізілген. 6 дана жоғарғы қысымнан орташа қысымға түсіретін «Газды реттеу пункті» және тұрғын үйлерге 1497 «Газды реттеу шкафтар» орнатылды. Оның ішінде, 1 абоненттік 832 дана, 2 абоненттік 665 дана, барлығы 2162 нүкте бар.

Қазіргі таңда кентте тұрғындарға сапалы әрі қауіпсіз газ жеткізу үшін «Қызылорда газ тарату жүйесі» мекемесінің Тереңөзек кенті учаскесі мамандары қызмет көрсету­де. Мұнда тәулік бойына «109» нөмірі арқылы диспетчер мен авариялық бригадасы жұмыс істеуде.

Аудан орталығын газдандыру жобасы 2016 жылы жасалғаны белгілі. Сол уақытта кент бойынша 2162 тұрғын үйге газ құбыры жеткізіледі деп жоспарланып, жүзеге асырылды. Ал 2016 жылдан осы уақытқа дейін Тереңөзекте жаңадан үйлер салынды, оған қоса кейбір үйлер жобаға енгізілмей қалған. Соның салдарынан қазір 334 тұрғын үй тұсына газ құбыры бармаған. Осы орайда, жобадан қалып кеткен және жаңадан салынған тұрғын үйлерге газ құбырын жеткізу мақ­сатында құны 143,8 млн теңге болатын жоба әзірленген. Ол жоба облыстық энергетика және тұрғын үй-коммуналдық шаруашылық басқармасымен 2022 жылға қаржыландырылу үшін ҚР Энергетика ми­нистрлігіне ұсынылған. Демек, ұсыныс қол­дау тапса, жоғарыда атап өткен тұрғын жай­лар да көгілдір отынның игілігін көретін бо­лады.

Сонымен қатар аудан орталығына жа­қын орналасқан елді мекендерді газдан­ды­руға тиісті жұмыстар жасалуда екен.

– Ауданға қарасты Қалжан ахун, С.Сей­фул­лин, А.Тоқмағамбетов және Ша­­ған ауылдарын газдандыруға жоба-сме­талық құжаттама әзірлеуге 29,7 млн тең­ге бюджеттен қаржы бөлінді. Бүгінде мем­ле­кеттік сатып алу жұмыстары бойынша же­ңімпаз анықталып, шарт жасалуда, – дейді аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Е.Бахтияров. Аталған елді мекен тұр­ғындары да алдағы жылдарда табиғи газ­дың пайдасын көруге ниетті.

Бөліп төлеу мүмкіндіктері бар

Тереңөзек кентінде газ құбыры же­лісін тұрғын үйлерге кіргізу бағытында 6 кәсіпкер өз қызметтерін көрсетуде. Атап айтқанда, «ҚазЭнергоПроэктСтрой», «Жү­ніс және К», «Шыңғысхан және К», «Қы­зылордаГазМонтаж LTD», «КапСтрой Инжиниринг» және «Жәрдем» ЖШС монтаждау жұмыстарын жүргізуде. Серік­тестіктердің жеке тұрғын үйлерді газға қосу қызметі 20 метрге дейін жылыту қазандығынсыз 90-120 мың теңге аралығын қамтиды. Ал 20 метрден асқан жағдайда әр метріне 1,5-2,5 мың теңге аралығында қосымша ақы қаралған. Десе де әр кәсіпкер монтаждау жұмыстарын жүргізуде өз мүмкіндіктеріне қарай жеңіл­діктер қарастырған.

– Ауданда газ құбырлары жүргізіле бас­тағаннан өз қызметімізді ұсынып, монтаждау жұмыстарын жүргізіп келеміз. Бүгінгі күнге дейін кенттегі көптеген тұрғын үйге газ орнатып бердік. Біздің қызметіміз бойынша 25 метрге дейін 110 мың теңге төлейді. Ал одан асып жатса, әр метрі 2000 теңгеден. Біз «Кас­пий» банк арқылы 12 және 24 айға дейін пайызсыз бөліп төлеу мүмкіндігін жасаймыз. Сондай-ақ 3-6 айға бөліп төлеуді де жүзеге асырудамыз. Көпба­лалы аналарға, мүмкіндігі шектеулі жан­дар­ға, тұрмысы төмен отбасыларға да жеңілдіктер қарастырып келеміз, – дей­ді «ҚазЭнергоПроэктСтрой» ЖШС дирек­торының орынбасары Дүйсенбек Сарбалақов.

Сонымен қатар «Шыңғысхан және К» ЖШС-нің директоры Қуаныш Әлжанов та тұрғындарға тиімді бағада қызмет ұсынып жатқанын айтады. Яғни, серіктестік жылыту қазандығынсыз 20 метрге дейін 85-90 мың теңге алады. Ал одан асып жатса, әр метрі 2000 теңге болады. Мұнда да 3-4 айға бөліп төлеу қарастырылған. Сонымен бірге «Homebank» арқылы төлеуге де мүмкіндік бар.

Енді орташа бағамен есептеп көрелік, газ құбырынан үйге дейінгі арақашықтық 30 метр болса, оған 115-120 мың теңге төленеді. Оған жылыту қазандығының бағасын қосамыз. Мамандар жылыту қазандығын үйдің көлемінен артық етіп алуға кеңес береді. Мәселен, үй көлемі 200 шаршы метр болса жылыту қазандығын 300 шаршы метрге жуық­татып алған дұрыс дейді. Аталған көлемдегі жылыту қазандығы маркасына қарай 160 пен 200 мың аралығын құрайды. Осыларды есептей келе үйге газ орнату 300-350 және одан да жоғары қаражатты талап етеді. Мұны біреудің қалтасы көтереді, бірінікі көтермейді. Сондықтан кейбіреулер кәсіпкерлер ұсынған жеңілдіктерге жүгінеді. Осыларды бағамдап, қалтаңызға қарай үйге газ кіргізуге қам жасарсыз...

Ердос БЕРКІНБАЕВ