Өрт сөндіру қызметі күрделі ме?

Мектеп жасындағы балаларға, әсіресе бастауыш сынып оқушыларына үйде шырпы ұстамаудың, газ баллондарына жақындамаудың, өрт қауіпсіздік талаптарын сақтаудың маңыздылығы ата-ана тарапынан ескертіледі. Бірақ отбасындағы талапқа қарағанда, мектепте айтылған ақыл-кеңес пен тәлім-тәрбие бөлек әсер етеді.

Тереңөзек кентіндегі №131 Т.Қо­зы­ба­ев атындағы орта мектебінің бас­тауыш сынып мұғалімі М.Сайымова өзі же­тек­шілік ететін сыныптың оқушы­ларын аудандық төтенше жағдайлар бөліміне алып барып, балаларға сала мамандарының жұмысын таныстырды. Сондай-ақ оқушыларға өрттің тілсіз жау екені, одан үнемі сақтану қажеттігі түсіндірілді.

Балалар бұған дейін тек кинода көрген үлкен машиналарға мініп, өрт сөндіру құралдарын қолмен ұстап, мекеме жұмысымен жан-жақты таныс­ты. Аудандық төтенше жағдайлар бөлімінің бас маманы Р.Беркінбаев оқушыларға өрттің кері әсері туралы кең көлемді мағлұмат берді. Балалар өздерін қызықтырған мәселелер бойынша сұрақтарын қойып, жауап алды. Мұнан бөлек өрт сөндіру саласының мамандарымен естелік суретке түсті.

– Соңғы уақытта кейбір өрт оқиғалары кішкентай балалардың қатысуымен орын алып жатқанын білеміз. Сондық­тан оқушыларға өрттен сақтануды үнемі түсіндіріп, айтып отырамыз. Бұл олардың оқыс оқиғаларды болдыр­мау мен алдын алу үшін маңызды рөл атқарады. Сырттай айтып, түсін­дір­геннен гөрі, көзбен көріп, қолмен ұстап, бетпе-бет пікірлессін деген мақсатта оқушыларды аудандық төтен­ше жағдайлар бөліміне әкелдім. Оқушылар ерекше әсер алды. Олар үй­де де, қоғамдық орындарда да өрт қауіп­сіздік талаптарын сақтайтындарын айтып, сала мамандарына уәде берді, – дейді бастауыш сынып мұғалімі Махаббат Сайымова.

Өз кезегінде төтенше жағдайлар бөлімінің бас маманы Р.Беркінбаев  оқу­шылар арасында өрт қауіпсіздік талаптарын түсіндіру жөнінде бастама көтерген ұстазға алғысын айтып, шығармашылық жеміс тіледі.

Балтабай ОРДАБЕКОВ