Қазақтың даңқты батыры
Тереңөзек кентінде орналасқан №210 О.Әбілпаттаев атындағы орта мектеп ұстаздарының ұйымдастыруымен даңқты батыр Бауыржан Момышұлының өнегелі өміріне арналған «Ұлт намысы болған ұлы тұлға» тақырыбында патриоттық іс-шара өткізілді. Оған аудандық мәслихат депутаты Ақтөре Ибрагимұлы, мектеп директорының міндетін атқарушы Айгүл Жаңабергенова, ұстаздар мен оқушылар қатысты.Іс-шара барысында Халық Қаһарманы Бауыржан Момышұлының майдан даласындағы ерлігі, Жеңісті жақындатуға атсалысқан айрықша үлесі жайлы кеңінен мағлұмат берілді. Оның шығармаларындағы жас ұрпақты Отансүйгіштікке, ерлікке, тәртіпке баулитын негізгі туындылары насихатталды. Патриоттық іс-шарада жиналған көпшілік майдангер қаламгердің «Қанмен жазылған кітап», «Ұшқан ұя», «Москва үшін шайқас», «Менің отбасым» секілді кітаптары жайлы өзара ой бөлісті. Өз кезегінде аудандық мәслихат депутаты Ақтөре Ибрагимұлы ержүрек батырдың шығармашылығы, ерен еңбегі, өнегелі істері жөнінде айтып берді.
– Бүгін ұйымдастырылып отырған тағылымды іс-шараның маңызы зор. Кеш барысында жас ұрпақ ұстаздар дайындаған даңқты ердің өмір жолымен қатар, мол мұрасына қанықты. Ержүректігімен танылған Бауыржан Момышұлы – сан қырымен танылған бірегей тұлға. Мәселен, тұлғаның құрметіне арналып, кентте бір көшенің атау берілген. Кескілескен майдан даласында сан мәрте ерлік көрсеткен Халық Қаһарманы Бауыржан Момышұлының ұлтты сақтап қалуда жасаған еңбегі ерен. Әр жылдары батырдың шығармалары зерттеліп, зерделеніп, әлемдік деңгейде насихаттала бермек. Осындай тағылымды іс-шараны ұйымдастырған ұлағатты ұстаздарға еңбекте абырой және шығармашылық жетістіктер тілеймін. Ал, оқушылардың ата-ана үмітін, ұстаздар сенімін ақтайтынына сенемін, – деді Ақтөре Ибрагимұлы.
Айта кету керек, мектеп директорының міндетін атқарушы Айгүл Жаңабергенова алдағы уақытта ұлы тұлғаларға арналған іс-шаралар жалғасын табатынын жеткізді.
Балтабай ОРДАБЕКОВ
