Мемлекеттік қызмет көрсету сапасы артады

Аудан әкімдігінде қоғам­дық ке­ңестің кезекті оты­рысы өтіп, оның күн тәртібінде екі мәселе қаралды. Отырысқа аудан әкімі Талғат Дүйсебаев, ҚР Мемлекеттік қызмет істері агенттігінің Қызылорда облысы бо­йынша департаментінің басшысы Рафхат Бисенов, аудандық қоғамдық кеңес төрағасы Марат Омаров, департамент қызметкерлері, ауыл әкімдері, мекеме басшылары мен БАҚ өкілдері қатысты.

Ел Президенті Қ.Тоқаев өзінің Жолдауында қоғамдық кеңестердің рөлін арттыру керектігін айтқан болатын. Осы ретте, қоғамдық кеңес отырыстарында мемлекеттік органдардың есеп беруі халықпен кері байланыс орнатудың нақ­ты көрінісі деуге болады.

Қазақстан Республикасының Мем­ле­кеттік қызмет істері агенттігінің Қы­­зыл­орда облысы бойынша депар­таменті тарапынан мемлекеттік қыз­мет саласындағы заңнамалардың орын­да­­луының мән-жайы туралы Қазақ­с­­­тан Республикасының Мемле­кеттік қыз­мет істері агенттігінің Қызыл­орда облысы бойынша департаментінің мем­лекеттік қызметтер басқармасының бас­­­шысы Ғалымжан Ілкібаев баян­да­ма жасады. Ол өз хабарламасында облыс, аудандарындағы мемлекет­тік көр­сетілген қызметтерге тоқта­лып, мониторинг жұмыстарының қорытын­дысымен таныстырды. Басқа аймақтарда мемлекеттік қызмет көрсету барысында орын алған заңсыздықтар біздің ауданда қайталанбас үшін әр сала қызметкерлері өз жұмысына мұқият болу керектігі айтылды. Алдағы уақытта тиісті аппараттық мәжілістерде мемлекеттік көрсетілетін қызмет барысын талқылауды ұсынды.

Одан кейін аудан әкімдігінің мем­лекеттік қызметтерді көрсету бағы­тында 2020 жылдың 10 айында ат­қарған жұмыстары туралы аудан әкімі аппаратының басшысы Талант Ерманов баяндама жасады.

– Қазіргі таңда аудан бойынша 56 өзі-өзіне қызмет көрсету бұрыштары жұмыс жасауда. Мемлекеттік қызмет көрсету бары­сындағы заң бұзушылықтардың алдын алу мақсатында аудан бо­йын­ша тұрақты түрде құқықтық жиын­дар өткізіліп келеді. Осы ретте, қыз­мет көрсету бөлімдерінде ішкі ба­қылау жұмыстары жүргізіліп оның қорытындысы бойынша аудандағы мем­лекеттік қызмет көрсетушілердің сапасын арттыру бағытында төрт әдіс­темелік семинар ұйымдастырылды. Жал­пы мем­лекеттік қызметтерді көрсету про­цесін оңтайландыру мақсатында кентте сервистік әкімдік ашылып, қазіргі таңда сервистік әкімдікте жеке және заңды тұлғаларға мемлекеттік қызмет көрсететін төрт бөлім жұмыс жасауда. Алдағы уақытта да аталған сала бойынша қызмет көрсету сапасын арттыратын боламыз, – деді аппарат басшысы.

Қоғамдық кеңес жұмысы аудан бо­йынша өзінің өте тиімділігін көрсетіп келеді. Бұл кеңес мүшелерінің бірлесе атқарған жұмысының нәтижесі. Кеңес соңында, аудан басшысы жиында көтерілген мәселелер бойынша тиісті сала басшыларына нақты тапсырма берді. Сонымен бірге мемлекеттік қызмет істері агенттігінің Қызылорда облысы бойынша департаменті жұмы­сының табысты болуына тілек­тестік білдірді.

Айдана ҚАЛИЕВА