Сырдария өзенінде сең жүруі мүмкін

Сырдарияда сең көбесі сөгілуі мүмкін. Себебі ақпан басталғалы өңірде күн қабағы жылы болып тұр, – деп хабарлайды 24.kz

Синоптиктер алдағы күндері термометр көрсеткіші 10 градусқа дейін көтеріледі деген болжам айтып отыр. Сыр өзенінің Жаңақорған, Шиелі аудандарындағы бөлігінде тіпті мұз қатпады.

Тек Қазалы мен Аралда 5-20 см аралығында мұз ұстасқан. Шардара су қоймасынан дарияға секундына 400 текше метр су тасталып, оның 300-і Көксарай контрреттегішіне кетеді. Қалғаны 1274 шақырымды құрайтын өзен бойымен ағып теңізге құйылуда. Дарияда жырылып кету қаупі жоғары 56 учаске бар.

Саид Молдақараев, ТЖД басшысының орынбасары: - Болуы мүмкін төтенше жағдайларға облыстың азаматтық қорғау күш-құралдары дайындық деңгейіне келтірілген. ТЖД жергілікті атқарушы органдардан күнделікті мониторинг жасап жатыр. Төтенше жағдай болса біздің қызметтердің бәрі дайын.