Бүгін Әбділда Тәжібавтың туған күні

Бүгін ақын, драматург, әдебиет зерттеуші ғалым, Қазақстанның халық жазушысы Әбділдә Тәжібаевтың туған күні. Ол 1909 жылы Қызылорда облы­сында дүниеге келген.

Белгілі ақын еңбек жолын 1926-1928 жылдар аралығында «Еңбекші қа­зақ» (қазіргі «Егемен Қазақстан») га­зе­тінде пошта тасушы, содан кейін кор­ректор болып бастаған. 1927 жылы «Жұмысшының гудогі» атты тұң­ғыш өлеңі «Жұмысшы» газетінде басылады. 1932-1934 жылдары Қар­сақбайдағы «Қызыл кенші», «Ле­­ниншіл жас» (қазіргі «Жас алаш») газеттерінде редактордың орын­басары қызметтерін атқарған. Жи­ыр­ма бес жастағы Ә.Тәжібаев 1934 жылы Қазақстан Жазушылар Одағы­ның хатшылығына, ал 1939 жы­лы оның төрағалығына сай­лан­ған.

1945-1948 жылдары Қазақ ҚСР Ғылым академиясының Тіл және әдебиет институтының Жамбылтану бөлімінің меңгерушісі қызметін ат­қарды. 1948-1958 жылдары шығар­машылықпен айналысып, 1958-1960 жылдар аралығында «Қазақ әдебиеті» газетінің бас редакторы, 1960-1962 жылдары Қазақстан Жазушылар Одағы басқармасының екінші хатшысы, 1962-1984 жылдары М.Әуезов атындағы Әдебиет және өнер институты театртану бөлімінің аға ғылыми қызметкері, бөлім меңгерушісі қызметтерін атқарған. 1963 жылы Қазақ КСР Жоғарғы Кеңесінің депутаты және Қазақ ҚСР Жоғарғы Кеңесі Төралқасының мүшесі болып сайланған. «Октябрь Революциясы», 2 мәрте Еңбек Қызыл Ту, Ленин, «Құрмет Белгісі» орденімен, бірнеше медальмен марапатталған.

30-жылдары ақынның «Жаңа ыр­ғақ», «Лирикалар» деп аталған тұң­ғыш жинақтары жарық көреді. Бел­гілі «Ор­кестр», «Абыл», «Толағай» сынды роман­тикалық поэмалары мен М.Әуе­зовпен бірігіп жазған «Ақ қайың» деп аталатын тұңғыш пьесасы да сол жылдардың жемісі. Ә.Тәжібаев халықтық аңыздар мен сюжеттер негізінде жазылған «Мер­ген», «Кілемшілер туралы ертегі», «Ақ­қу» «Күй атасы», тағы басқа біршама поэманы дүниеге әкелген. Ол «Қазақ әдебиетінің тарихы» атты зерттеу еңбекті құрастыруға қатысып, соңғы басы­лымының редакциясын басқарған.

Ә.Тәжібаевтің сценарийі бойынша (Н.Погодинмен бірге) «Жамбыл» кино­фильмі түсірілген. А.Пушкин, Т.Шев­ченко, А.Островский, Г.Гейне, тағы басқа қаламгерлердің бірқатар шығармасын қазақ тіліне тәржімалаған. Ә.Тәжібаевтің көптеген шығармалары шетел тілдеріне аударылған.

Қызылорда қаласында көрнекті жа­зушыға ескерткіш орнатылған. Қы­зыл­орда облыстық әмбебап-ғылыми кітап­ханасы ақын есімімен аталады. Сондай-ақ Сырдария ауданында мектеп-лицей мен кенттің бір көшесі ха­лық жазушысының құрметіне берілген.