Шиелі ауданында бүгінгі күнге дейін 24 көлден жылына 51 тонна балық ауланып, бюджетке 6 млн. 600 мың теңге көлемінде салық төленген. Өңірлік коммуникациялар қызметінде өткен брифинг барысында аудан әкімі балық шаруашылығының жай-күйіне тоқталды.

- Аудан көлеміндегі 36 көлдің 24-і бүгінгі күнге дейін он жылдық мерзімге жалға берілсе, алдағы уақытта 12 көл конкурс арқылы кәсіпкерлерге табысталатын болады, - деді аудан басшысы. Осы көлдерде балық шаруашылығымен айналысатын дара кәсіпкерлер мен жеке тұлғаларды біріктіріп, балықшылардың 1 кооперативі құрылып, бұл жұмыстар одан әрі жалғасын табатын болады. Сондай-ақ, бұл шаруашылық қазіргі таңда 75 адамды жұмыспен қамтамасыз етіп отыр. Алдағы уақытта «Күміскеткен» су қоймасы салынса, балық шаруашылығы дамып, ауланатын балық көлемі еселеп артатын болады деп күтілуде.