Тіршілік тынысы Tirshilik-tynysy.kz ақпараттық агенттігі
» » Еріш аға жайлы естелік

Еріш аға жайлы естелік

Мен ұзақ жылдар бойы жақсы қатынасып сыйласқан абзал азамат­тарымыздың бірі – Еріш Тұрсынбаев аға. Ерекеңмен 1965 жылдан бас­тап қызмет бабында қатар жүріп, араласа бастадым. Мен ол кезде аудандық партия комитетінде (сол жылдары Сырдария селолық өндірістік партия комитеті деп аталатын) партстатистика және бірыңғай партия билеті секторының меңгерушісі едім. Ал Ерекең ұйым­дастыру бөлімінің нұсқаушысы болды. Партия қатарына жаңа­­дан қабылданушыларға тол­ты­ры­латын Ерекең дайындаған құ­жат­­тармен танысқанымда ол кісі­нің іскерлігіне тәнті болатынмын. Ерекең өз ісін аса жауапкершілікпен атқарып, бір­ге істеп жүрген ұжым­дастарының арасында беделді болды. Ерекеңді талғамы да, талабы да күшті аса іскер басшымыз Қазантаев Қонекең де қатты сыйлайтын еді, ол кісіні өзгелерге өнеге ететін. Сол жылдары аудандық партия комитетінің идеология жөніндегі хатшысы Исаевтың бастамасы бойынша жо­ғарғы саяси білім беретін партия активтерінің мектебі ашылған болатын. Осы мектепте оқып жүрген партия активтеріне семинарда баяндама жасау үшін саяси тақырыптар берілетін. Ерекеңнің жасаған баяндамасы мазмұнды болып, тыңдап отырған кісілерді сүйсіндіріп, оқытушылар тарапынан жоғары баға берілетін. Қызметтес болған Төлеген Әбілдаев, Сейт­мұрат Ембергенов, Абызбай Маханбетов, Камаладдин Наурызбаев, Ізхан Досмағанбетов – бәріміз көпті көрген, Ұлы Отан соғысына қатысқан ардагер азамат Ерекеңді аға ретінде ардақтап, сыйлайтын едік. Әсіресе, Сейтмұрат ол кісіні «қайнаға» деп әзілдесіп, бірін-бірі қатты қадірлеп, отбастары да жиі араласатын еді.

Ерекең мінезге бай, байсалды, сабырлы, ақпейілді, әділ, турашыл, өтірікке жаны қас кісі болатын. Өзінің осындай адамгершілік қасиетімен кісіні өзіне баурап алатын. Ерекеңмен аупарткомда бір­ге қызмет істеп жүрген кезімізде демалыс күндері де бір мезгіл кеңсеге барып отырып, ертеңгі істейтін жұмыстарымызды жоспарлап, қол босаған соң Ерекеңнің кабинетіне барып әңгімелесетінбіз. Әңгімеден әңгіме туындап, Ерекең майданда бастан кешкен оқиғаларын ай­тып беретін. Әңгімелерінен ол кісі­нің майданда радист-телефонист болғаны, соғыста байланыс сымы үзі­ле­тінін, үзілген байланыс­ты қал­­пына келтіру аса қауіпті екен­­дігін, мұндайда аңдыған жау мергендерінің оғынан аман қалу­дың өзі екі талай екендігін, талай рет осындай жағдайларды басы­нан кешіргенін айтып, елге аман оралғанына тәубә дейтіні ес­те қа­лыпты.

Демалыс күндерінің бірін­­де Ерекең екеуіміз түс кезінде қыз­мет орнынан үйге бірге қайттық. Ерекең өз үйіне қарай көше бұрылы­сына келгенде:

– Рақымжан біздің үйге барып, шай ішіп отырып әңгімелесейік, – деді.

Ерекеңнің үйінде шай ішіп әңгі­мелесіп болғаннан кейін, мен рақ­метімді айтып кеткелі жатқа­ным­да, Ерекеңнің жұбайы Райля келіп, өзі­нің қазанға ас салып қойғанын айтып, қайтуыма рұқсат бермеді. Асы­лып жатқан асты тастай алмай отырысты онан әрі жалғастырдық. Мен Райляның күйеуін өз атымен атамай, сыйластықпен «Ереке» деп аялайтынын есітіп, разы болдым. Ол кісімен кейін аудан мекемелерінде басшы болып қызмет істеген жылдарында да сыйластығымыз жалғаса берді. Ерекең қай қызметті де біліктілікпен басқарып, абыройлы болды. Ере­кең­мен зейнетке шыққаннан кейін де әрдайым кездесіп, хал-жағдай сұрасып тұратынбыз. Сонда Ерекең: – Қан­дай қырғын майдандағы от пен оқтан аман қалып, елге оралып, отбасын құрып, ұлды ұяға, қызды қияға қондырып, бұйырған қызметтерді абыроймен атқарып, қарттық жас­қа келіп, немере, шө­бере сүйіп отырғаныма шүкірлік етемін. Алла тағаланың берген нығ­метіне разымын. Алланың берген аманат жанын бүгін аламын десе де разымын, мен даярмын, – деп отыратын.

Еріш ағаның Ұлы Отан соғысы кезіндегі ерлігі үшін «Отан соғысы» ордені, «Германияны жеңгені үшін» және басқа медальдарымен, ал бейбіт өмірде ауданымыздың экономикасын дамытудағы сіңірген еңбек­тері ескеріліп, көптеген мемлекеттік марапаттарға ие болды. Ерекеңе көп жылдар бойғы мінсіз, қажырлы еңбегі үшін «Сырдария ауданының құрметті азаматы» атағы берілді.

Ерекең мен Райля жеңгеміз өздерінің ұл-қыздарына жақсы тә­лім-тәрбие беріп, әлеуетке жеткіз­ді. Олардың Серік атты ұлы «медицина ғылымының докторы» ғылыми атағына қол жеткізіп, қазірде Алматыда республикалық медицина қызметкерлерінің біліктілігін арттыру және қайта даярлау институтында кардио-хирургия кафедрасының меңгерушісі болып, жоғарғы санат­ты дәрігер ретінде танымал болып, халқына адал қызмет ат­қарып жүр. Ерекеңнің өзге балалары мен қыздары да ата-ана дәстүрін жалғастырып, еліміздің дамуына өз мамандықтары бо­йын­ша қызмет етіп, үлес қосуда. Ерекең қазірде ара­мызда жоқ, бірақ оның жарқын бейнесі жүрегімізде сақтаулы.

Біздер – замандастары Ұлы Отан соғысының ардагері, Сырдария ауданының құрметті азаматы Еріш Тұрсынбаевқа Тереңөзек кен­ті жаңа қоныс аймағынан көше атауы берілуін дұрыс деп санаймыз. Осыдан бірнеше жыл бұрын Ерекеңе көше атауын беру жөнінде онамастикалық комиссияның шеші­мі де шыққан болатын. Алайда бұл шешім белгісіз себептермен орындалмай қалған екен. Сол шешім қайта жаңғыртылып, Е.Тұрсын­баев­қа көше атауы тездетіп берілсе дұрыс болар еді.

Рақымжан БӘЙМЕНОВ,
Сырдария ауданының құрметті азаматы
03 тамыз 2021 ж. 605 0