Ұлттық ойынды оқушылар арасында кеңінен насихаттау, дамыту мақсатында Ә.Тәжібаев атындағы №36 мектеп-лицейінде 2-4 сынып оқушыларының арасында тоғыз­құмалақтан жекелей аудандық турнир өтті. Турнирдің алғашқы сөзі мектеп-лицей директоры Айнұр Әлиева, аудандық білім бөлімінің әдіскері Сұлтан Жеңісбекұлына берілді. Мектеп-лицей директоры Айнұр Әлиева турнирдің ашылуымен құттықтап, жарысқа қатысушыларға сәттілік тіледі.

Денешынықтыру пәнінің мұға­лімі, тоғызқұмалақ үйірмесінің жетек­шісі Жасұлан Бахторазовтың ұйым­дастыруымен өткен турнирде қыздар мен ұлдар швейцар жүйесінде жекелей рапид түрінен бақ сынады.

– Тоғызқұмалақ ойынының мәні – адамға үйлесімді тәрбие беру, кез келген жанның ақыл-ойын шыңдау, ми қызметін дамыту және қоғам алдын­дағы жауапкершілікті арттыру. Бұл ойын жетілген спорт түрлерінің бірі ретінде адамзатты жаңа шыңдарға жетелейтін ойы кең, рухы биік, саналы тұлғаларды тәрбиелеудің қуатты құралы бола алады. Осындай турнирді ұйымдастырудағы басты мақсат – оқушылардың спорттық шеберлігі мен зияткерлік қабілетін қалыптастыру, жарыс жолында шыңдалуға, бір-бірімен тәжірибе алмасуға атсалысу, – дейді тоғызқұмалақ үйірмесінің жетекшісі Жасұлан Бахторазов.

Тартысты додаға ұлттық дәреже­­­де­гі төреші Мұхтар Ақылбекұлы төрешілік жасады. Турнир қорытындысы бойын­ша бағы мен бабы оза шапқан жарыс жеңімпаздары мен жүлдегерлері аудандық білім бөлімінің дипломымен, медалімен және демеушілердің арнайы дайындаған сыйлығымен марапатталды.