Жеңіске жеткен жасөспірімдер
Басылым – оқырманымен құнды. Біз қашанда көпшіліктің ұсынысы негізінде тұрақты түрде газет бетіне мақала жариялап келеміз. Жақында Тереңөзек кентінің тұрғыны Мейіржан Әлібекұлы хабарласып, аудан тоғызқұмалақшыларының облыстық ашық біріншілікте жеңімпаз болғанын айтып, сүйінші сұрады. Арал ауданына қарасты Сексеуіл кентінде тоғызқұмалақтан өткен ашық біріншілікте сырдариялық бірнеше спортшы жеңіс тұғырынан көрінді.Тоғызқұмалақтан 9-11 жас спортшылар арасында жүзеге асқан № 20 балалар жасөспірімдер спорт мектебінің ашық біріншілігіне балғын ұлттық шеберлерін №11 олимпиадалық резервтің мамандандырылған балалар-жасөспірімдер мектебі жаттықтырушысы Мұхтар Әбжапбаров бастап барды. Облыстық бәсекеде спортшылар тоғызқұмалақтың классика және блиц түрінен бақ сынады.
– Кез келген ата-ана баласы үшін тақым қысатыны жасырын емес. Менің ұлым Қайсар Әлібек осы жарыста жеңіс тұғырынан көрінді. Аз ғана уақыттың ішінде V Дүниежүзілік көшпенділер ойынының жеңімпазы Бексұлтан Бостандықов жаттықтырып, жеңіс жолында жігерлендіріп келеді. Шын мәнінде, зияткерлік ойынның балаларға берері мол. Әркез ата-ана ретінде перзентімізге қолдау көрсетеміз. Оның алғырлыққа жетелейтін спорт түрінен орасан зор жетістікке қол жеткізетініне сенеміз, – деді Мейіржан Әлібекұлы.
Ашық біріншіліктің нәтижесінде, Қайсар Әлібек классикадан ІІІ орын, блицтен І орын, Сабира Ермағанбет екі санат бойынша ІІІ орын, Әлинұр Нұрханұлы блицтен ІІІ орын, Ержігіт Ұзақбаев классикадан ІІІ орын, блицтен ІІ орын, Жанболат Серікбаев блицтен ІІІ орын, Альфия Бабабек классикадан І орын, блицтен ІІ орын, Саида Бақтиярова классикадан ІІІ орын иеленді. Жеңіс тұғырынан көрінген спортшылар №36 Әбділда Тәжібаев атындағы мектеп-лицейі мен №131 Талғат Қозыбаев атындағы орта мектептің оқушылары екенін айта кетейік.
Балтабай ОРДАБЕКОВ
