Әлем чемпионы атанды
Қазақстандық кәсіпқой боксшы Жәнібек Әлімханұлы WBO және IBF нұсқалары бойынша әлем чемпионы атанды, Ол АҚШ-тың Техас штатындағы Розенбергте өткен турнирде қарсыласы неміс боксшысы Винченцо Гуальтьериді жекпе-жектің алтыншы раундында нокаутпен жеңіп, IBF нұсқасы бойынша әлемнің жаңа чемпионы атанды.Мемлекет басшысы Қасым-Жомарт Тоқаев қазақтың кәсіби боксшысы Жәнібек Әлімханұлын жарқын жеңісімен құттықтады.
«Жәнібек қазақ бокс мектебінің жоғары деңгейі мен мықтылығын әлемге тағы да паш етті. Бұл жеңіс бокспен айналысатын жастарды биік белестерді бағындыруға ынталандырады. Сізге зор денсаулық, бақ-береке тілеймін. Жеңістен жеңіске жете беріңіз!» деп жазды Мемлекет басшысы «Twitter» әлеуметтік желісіндегі жеке парақшасында.
Айта кету керек, кәсіпқой боксшы Ж.Әлімханұлы осыған дейін рингте 15 жекпе-жек өткізіп, барлығында жеңіске жеткен. Отандастарымызға қуаныш сыйлаған жеңісінен кейін журналистерге берген сұхбатында «Qazaq Style» стилін тарихта қалдырғысы келетінін айтты. Спортшы орта салмақтағы әлемнің абсолютті чемпионы болуды көздейді.
– Бұл жолы жеңіске жететініме кәміл сендім. Өйткені дайындығым жақсы болды. Оның үстіне маған қолдау білдірген қазақстандықтардың тілегінен шабыт алдым. Қазақ бокс мектебінің атын әлі талай жақсы жағынан шығарамыз,– деді ол.
«Тт» ақпарат
Фото: ашық дереккөзден
