Жаңа норма: Балалар көркем гимнастикаға 5 жастан, боксқа 12 жастан қабылданады

Елімізде балалардың спорттық жаттығуға жіберілетін ең төменгі жасы бекітіледі. Бұл туралы ҚР Мәдениет және спорт министрі Дәурен Абаев айтты, деп хабарлайды ҚазАқпарат.

«Спорт түріне байланысты балалардың жаттығуға жіберілетін ең төменгі жасы бекітіледі. Бұл жерде біз қолданыстағы нормативтік-құқықтық базаға сүйенеміз. Оның ішінде, «Спорттық резервті дайындау бойынша оқу-жаттығу процесі жүзеге асырылатын дене шынықтыру-спорттық мекемелерде спорт түрлері бойынша спортшылардың жасын бекіту туралы» бұйрықты негізге аламыз», - деді Дәурен Абаев Орталық коммуникациялар қызметіндегі баспасөз мәслихатында.

Министрдің дерегінше, көркем гимнастикаға 5 жастан, ал боксқа 12 жастан бастап баруға болады.

«Әрине, мұндағы басты мақсатымыз – балалардың денсаулығын қорғау», - деді ол.