Үш үміткердің есімі белгілі

Өткен аптада «AMANAT» партиясы Қызылорда облыстық филиалының кезектен тыс XXІХ конференциясы өтті. Жиында партияның жаңа Сая­си Тұғырнамасының жобасы тал­қыланып, 6 қазан күні Астана қала­сын­да өтетін партияның кезектен тыс ХXIV съезіне Сыр елінен делегаттар сайланды.

Алқалы басқосуда «AMANAT» партиясы облыс­тық филиалының Атқарушы хатшысы Ләйлә Төрешова Саяси Тұғырнама жобасы бойынша бір­неше ай көлемінде түрлі сарапшылар тарапынан пі­кірталас қалыптасқанын атап өтті. Сондай-ақ об­лыстық мәслихат хатшысы Наурызбай Байқадамов пен «Қоғамдық келісім» коммуналдық мемлекеттік мекемесі директорының орынбасары, саясаттанушы Сәулет Сахиев сөз алып, Тұғырнаманың негізгі мақсаты мен одан туындайтын міндеттер төңірегінде хабарлама жасады. Мұнан соң күн тәртібіне сәйкес конференция шешімімен Сыр өңірінен «AMANAT» партиясының кезектен тыс ХXIV съезіне қатысатын 35 делегат сайланды.

Конференция барысында облыс әкімі Нұрлыбек Нәлібаев жаңа Тұғырнаманың ел дамуындағы жа­ңа кезеңнің басты идеологиялық құжаты болатынына сенім білдірді және съезге қатысатын сыр­бойылықтарға сәттілік тіледі.

– Еліміздегі қабылданған реформалар сайлау жү­йесі мен саяси партияларды дамытуға арналғанын да ескерсек, баршамыз демократия дәстүрлерін одан әрі нығайтып, өзара жауапкершілік пен сенімге не­гізделген жаңа саяси мәдениетті қалыптастыруға белсенді қатысуымыз қажет. Бұл үшін барлығымыз Мемлекет басшысының әрбір бастамасына қолдау білдіріп, басты құндылықтар болып табылатын – тә­уел­сіздік, жалпыұлттық бірлік, бәсекеге қабілетті эко­номика, білімді өркендеген қоғам, заң және тәр­тіп секілді ортақ басымдықтарды сақтап қана қой­май, оны әрі қарай нығайтуымыз керек, – деді аймақ басшысы.

Айта кетейік, «AMANAT»-тың өңірлік филиал­да­рындағы 20 конференцияның қорытындысы бойынша партияның кезектен тыс XXIV Съезіне 700 делегат сайланған.

Ал «Астана» халықаралық ғылыми кешенінің эко­­номикалық зерттеулер институтының басшысы Мейрам Қажыкен кезектен тыс президент сайлауына өз кандидатурасы ұсынылғанын растады.

«Өткен аптада «Аманат» Қазақстан кәсіподақтар достастығы» республикалық кәсіподақтар бірлес­ті­гінде жиын болып, кезектен тыс өтетін президент сай­лауына менің кандидатурам ұсынылған бола­тын. Ұйым мүшелері қолдап дауыс берді. Ертең Орталық сайлау комиссиясына барып, үміткер ретінде тір­келу жұмыстарымен шұғылданамын», – деді Мейрам Қажыкен. Бұған дейін Жалпыұлттық социал-демократиялық партиясы – Нұрлан Әуесбаевты, «Ауыл» халықтық-демократиялық пат­риот­тық партиясы Жигули Дайрабаевты кезектен тыс президент сайлауына кандидат ретінде ұсынған болатын. Сонымен әзірге үш үміткердің есімі белгілі болды. Алдағы уақытта үміткерлер қатары тағы да артуы мүмкін.

Ақтөре ИБРАГИМҰЛЫ