Жас сайлаушылар клубы: Жастар бір диалог алаңында бас қосады

Заң шеңберінде сайлау жұмысын жүргізе отырып, ашықтық қағидатын ұстану – мемлекеттің алға қойған мақсатының бірі сана­лады. ҚР Орталық сайлау комис­сиясы төрағасы Нұрлан Әбдіровтің тапсырмасы негізінде сала жұмысына серпін бере отырып, Сырдария ауданында жас сайлау­шылар клубы құрылды. Бұл баста­ма – еліміздегі сайлау қызметінің маңыздылығын арттыруға бағытталған жоба.

Сырдария аудандық сайлау комиссиясы жаны­нан құрылған жас сайлаушылар клубының құрамы 11 адамнан тұрады. Клубқа аудандық жастар ресурстық орталығы директорының орынбасары Мұхамед Сейілханов жетекшілік етсе, хатшылық қызмет міндеті Талғат Қозыбаев атындағы №131 орта мектептің мұғалімі Гүлжанар Әбіловаға жүктелген. Қазіргі уақытта ауданға қарасты бірқатар елді мекеннің белсенді жасы клуб жұмысын жандандыруға ынталы.

– Сырдария аудандық сайлау комиссиясы жастар ресурстық орталығымен бірлесіп, арнайы ережені бекіттік. Жалпы клубтың қатысушылары өңірлік жастар ресурстық орталықтарының, білім беру ұйымдарының, коммерциялық емес қоғамдық бірлестіктердің, сондай-ақ мемлекеттік органдардың өкілдері бола ала­ды. Клуб қатысушыларының құрамы 18-35 жас аралығындағы белсенді жастардың өтініші не­месе келісімі негізінде қалыптастырылады және әрбір қатысушысына тиісті куәлік табыс етіледі. Клуб қызметіне сан түрлі форматта іс-шара өткізіп, жастардың назарын сайлау процесінің өзекті мәселелеріне аудару, олардың сайлау белсенділігі мен құқықтық мәдениетін арттыру кіреді. Алдағы уақытта жас сайлаушылар тарапы­нан ұтымды ұсыныстар жасалып, саланың дамуы­на өзіндік көзқарастарын танытатынына сенеміз, – деді Сырдария аудандық сайлау комиссиясының төрағасы Ермек Шайлан.

Айта кетейік, клуб қызметін ұйымдастыруда жастарға бағыт-бағдар беретін кәсіби маман­дардан жұмысшы топ құрылған. Бүгінде ау­дан көлемінде клуб жұмысын жетілдіру мен құрылымын таныстыру мақсатында сан түрлі іс-шара ұйымдастырылуда. Жас сайлаушылар құрамын жасақтау, жұмыс барысын таныстыру мақсатында клубтың алғашқы жиыны өткізілсе, Талғат Қозыбаев атындағы №131 орта мектепте «Парламент» ұйымының мүшелері «Peer-to-peer educarion» (тең-теңімен оқыту, өзара оқыту) фор­матында іс-шара ұйымдастырылды.

– «Қазақстан Республикасындағы сайлау ту­ралы» Конституциялық заңы шеңберінде сай­лау процестері өткізіліп келеді. Аудан жастары­нан құралған клуб құрамында Иса Тоқтыбаев атындағы №35 мектеп-лицейдің мұғалімі Олжас Сақыбеков, Түймебай Айтбаев атындағы №132 орта мектептің мұғалімі Аружан Әбдрахманова, Шіркейлі ауылдық мәдениет үйінің маманы Бексұлтан Сайлаубеков, №37 мектеп-лицейдің мұғалімі Күнту Ахметов, Абай атындағы №130 орта мектептің мұғалімі Гүлімай Тәжібаева, Қалжан ахун ауылдық округі әкімі аппаратының әдіскері Назерке Сәбитова, Асқар Тоқмағанбетов ауылдық округі әкімі аппаратының әдіскері Ер­лан Нұрғалиев, Аманкелді ауылдық округі әкімі аппаратының бас маманы Мейірхан Ишанбек, Бесарық ауылдық округі әкімі аппаратының бас маманы Талғат Кішкенбаев бар, – деді жас сайлаушылар клубының төрағасы Мұхамед Сейілханов.

Балтабай ОРДАБЕКОВ