Қызылордада 24 нысанның шатыры ұшты
«Қазгидромет» РМК Қызылорда филиалының дауылды ескертуіне сәйкес 1-2 сәуірде облыс орталығында 15-28 м/с қатты жел, шаңды дауыл орын алды. Дауылдың әсерінен «112» - Дағдарыс жағдайында басқару басқармасына 18 қоңырау түскен, оның ішінде 17-і шатырдың ұшуы және 1-і құбырдың құлағаны туралы қоңырау соғылды. Бұл туралы Өңірлік коммуникациялар қызметінің баспасөз алаңында Қызылорда облысы Төтенше жағдайлар департаментінің бастығының орынбасары Бекболат Әбдіқадыров мәлімдеді, деп хабарлайды Kyzylorda-news.kz.Қызылорда облысы әкімі аппаратына жалпы 24 нысанның шатыры ұшу оқиғалары тіркелді. Оның ішінде 7 білім беру ұйымдарында (оның ішінде 6 мектеп, 1 колледж), 3 ауылдық мәдениет үйінеде, 9 мемлекеттік мекеме (оның ішінде 2 коммуналдық, 1 мешіт), 2 көпқабатты тұрғын үй, 3 жеке тұрғын үй.
Барлығы 2909 шаршы метр шатыр ұшып, казіргі таңда жергілікті атқарушы органдардан комиссия кұрылып, келтірілген шығындар бойынша жұмыстар жүргізілуде.
«Жоғарыда аталған жағдайлар бойынша зардап шеккендер мен қаза болғандар жоқ. Осы брифингті пайдалана отырып, ауа райының қолайсыздығы әлі де жалғасуда екендігін, көпшілікке көшеде жүргенде сақтық шараларын естен шығармау қажеттігін ескертеміз, ауа райының қолайсыздығына орай мүмкіндігінше қатты дауыл күндері жолға шықпауды сұраймыз», - деді Бекболат Әбдіқадыров.
