«ТҰЛПАР МІНІП, ТУ АЛҒАН»

Ұлттық құндылық­тардың көкжие­гі кеңейіп, дәстүр сабақтастығы ата­дан мирас ретінде кей­інгі ұрпақтың мүд­десі үшін айрықша жұ­мыс жасауда. Қазіргі таңда жазғы демалысқа шыққан оқушылардың кө­бі уақы­тын құр жі­бермей жыр жаттауға ма­шықтану үстін­де.

Оған дәлел Елбасы Нұр­сұлтан Назарбаевтың «Бо­ла­­шаққа бағдар: рухани жаңғыру» және «Ұлы даланың жеті қыры» мақалаларында қойылған мін­дет­терді іске асыру мақсатында ұйымдастырып отырған «Qazaq Epos» республикалық ағарту жобасы «Тұлпар мініп, ту алған» байқауы болып отыр. Аталған байқаудың негізгі мақсаты өскелең ұрпақты халық поэзиясына, қазақ халқының рухани асыл мұрасына деген сүйіспеншілікке және патриотизмге тәрбиелеу, елдік пен ерлік рухын, намысшылдық, қайсарлық қасиеттерге баулу екені айдан анық.

Жалпы алғанда байқау респуб­лика бойынша 6-10 сынып оқушы­лары арасында өткізіледі. Осы ретте қатысушылар «Қобыланды батыр» жырының Марабай жырау нұсқасын жатқа айтып, жырдың ішіндегі көнер­ген тарихи сөздердің мағына­сын ашып, қазақ тілі мен әдебиеті оқулығы бойынша әзірленген сұрақтарға жауап береді. Ауданнан 200-ге жуық оқушы бақ сынайтын жобаға дайындық барысы туралы №35 И.Тоқтыбаев атындағы мектеп-лицейде өткен жиын­да талқыланды. Бұған аудан көлеміндегі мектептерден өтініш біл­дірген ұстаздар мен оқушылар қатысты.

Кездесу барысында ұйымның сенімді өкілі Дәурен Сейітжанұлы байқаудың өткізілу барысын түсін­дірді. Көпшілікті толғандырған сұрақ­тарға жауап беріп, тұщымды ойын ортаға салды. Байқау үш кезең­нен яғни аудандық, облыстық, респуб­ликалық деңгейде болады. Аудандық кезеңнен дараланған үш жеңімпаз бен жүлдегерлерге арнайы диплом мен бағалы сыйлық беріледі. Аталған жиын барысында бірқатар оқушының дайындығы пысықталды.

«Тұлпар мініп, ту алған» байқауы осы күні танымал тұлғалардың зор қолдауына ие. Алдағы уақытта қатысушы талапкерлер арнайы жырды жаттай отырып, тілдің еркін машықталуына, ойды анық жеткізуіне, шешендік өнерге, рухани байлыққа, әдеби потенциалы жоғары білімді болуға талпынады. Болашағынан зор үміт күттіретін олар жырды мәнерлеп оқып, мән-мағынасын кеңінен ашатын болады. Жырдағы тарихи шындық пен боямасыз өмір жас ұрпақтың айқын көзқарасын қалыптастырып, дүниетанымын дамытады деп сенеміз.

Б.ОРДАБЕКОВ