Шығыс медицинасы бойынша адамның құлағының формасына, көлеміне және қалай орналасқанына қарап оның мінезінің ерекшелігін, ерік күшін, белсенділігін, сондай-ақ денсаулығын да білуге болады. Сондықтан психолог, психиатр мен криминалист болмасаңыз да, мұны біле жүргеннің зияны жоқ.
Егер құлағы  қасынан жоғары орналасса, онда ол адам өте жоғары интеллект иесі болғаны.  Ал құлағы қасымен бір деңгейде орналасса – ол адам лидер болуға ұмтылады және өз бетінше кесіп-піше алады деген сөз. Мұндай адамдар оптимист болып келеді және көздеген мақсатына күш салуымен ерекшеленеді.
Ал енді құлағы қасынан төмен, көзімен бір деңгейде орналасса, онда ол орташа интеллектінің адамы. Құлағы көзінен төмен орналасса, онда ол дарынсыздықтың, ақыл-ойдың кемдігінің  белгісі.
Бір құлағы екіншісінен биік орналасса – ондай адаммен бәстесіп әуре болмаңыз. Себебі, ондайлар логикаға бағынбайды, жеңілгенін мойындамайды.
Құлағы тым кішкентай (6 см-ге дейін) адамдар – жеңіл, үстірт ойлайтындар. Романтик кейіптегі мұндай адамдар кез келген кісінің уәдесіне, анты мен сертіне құлай сенгіш болып келеді. Денсаулығы пәлендей мықты болмайды.
Құлағы орташа адамдар кертартпа, ескішіл болып келеді. Есесіне отбасы мен қызметті шебер үйлестіре біледі.
Құлақтың үлкен (7 см-ден үлкен) болып келуі өзіне деген сенімділікті, пысықтықты, еті тірілікті білдіреді. Әрі мықты денсаулықтың белгісі.
Үлкен қалқан құлақ көбінесе өте талантты музыканттарға тән. Мәселен, бұған Нұрғиса Тілендиев пен Шәмші Қалдаяқовтың құлағын жатқызуға болады.
Егер сол құлағы оң құлағынан үлкен болса, онда оның иесі нақты ғылымдарда үлкен табысқа жетеді, ал оң құлағы үлкендер – тумысынан гуманист адамдар.