Берекелі ауыл – бейбіт өмір бастауы

Ішімдік адамның денсау­лығына ғана емес, оның отбасына, тұрмысына, еңбекке деген қабілетіне және қоғамдағы қарым-қатынасына кері әсер етеді. Оны әдетке айналдыру уақыт өте келе адам өміріне түбегейлі өз салқынын тигізіп, отбасы берекесінің бұзылуына, түрлі келеңсіз жағдайлардың орын алуына себеп болуы мүмкін. Ал дені сау, саналы әрі жауапкершілігі жоғары ұрпақ тәрбиелеу – кез келген қоғам­ның басты міндеті.

Бүгінде бұл бағытта ауқым­ды бастамалар қолға алынып келеді. «Қылмыссыз өңір – кемел келешек кепі­лі» жобасы аясында елді мекеннің тыныш­тығы мен тұрғындардың бе­рекелі тұрмы­сын басты орынға қоятын ауылдардың қатары артып отыр. Бұл саламатты өмір салтын қалып­тастыру және құқық­бұзу­шылықтың алдын алу бағы­тындағы жүйелі жұмыс нәтижесі деуге негіз бар.

Ауыл тұрғындары арасында ішімдікке қарсы мәдениетті қалып­тастыру, жастарға өне­­гелі тәрбие беру және қоғамдық тәртіпті сақтау бағы­тында бірқатар түсіндірме және профилактикалық іс-шара­лар тұрақты түрде жүргі­зілуде. Бұл бастама ауыл ақса­қалдары, қоғамдық кеңес мүшелері, жастар және бел­сенді тұрғындардың қол­дауымен жүзеге асуда.

– «Ішімдіксіз ауыл» бастамасы – қоғамның қауіпсіздігі мен тұрғындардың әл-ауқатын арттыруға бағытталған маңызды қадам. Ішімдікке тәуелділік жеке адамның мәселесі болып қана қалмай, отбасындағы ахуалға, қоғамдық тәртіпке және жас ұрпақтың тәрбиесіне де әсер етеді. Сондықтан мұндай келеңсіздіктердің алдын алу тек құқық қорғау органдарының емес, бүкіл қоғамның ортақ міндеті. Тұрғындардың ішімдіксіз өмір салтын таңдауы – ең алдымен, ауылдағы тыныштық пен отбасылық берекені сақтауға жасалған нақты қадам. Заң бұзушылықтың алдын алу жазалаудан бұрын, оның себептерін болдырмаудан басталады. Осы тұрғыдан алғанда, ел азаматтарының саламатты өмір салтын ұстанып, қоғамдық тәртіпті сақтауға белсенді атсалысуы маңызды. Берекелі ауыл – қауіпсіз ортадан, ал қауіпсіз орта – саналы таңдау мен ортақ жауапкершіліктен қалып­тасады. Аталған игі бас­тама ауылдағы қылмыстың, тұрмыстық жанжал мен құқық бұзушылықтың азаюына оң әсерін тигізіп, тұрғындардың бірлігі мен берекесін арттыруға ықпал етуде. Алдағы уақытта да қоғам қауіпсіздігін қамтамасыз ету, жастар тәрбиесі және зиянды әдеттердің алдын алу бағытындағы жұмыстар жалғасын табатын болады, – дейді аудан прокуроры Абай Әлімбаев.

Айта кетейік, қазіргі таңда ауданда жеті ауыл ішімдіктен бас тартып, жобаны қолдап отыр. Атап айт­қанда, Іңкәрдария, Қалжан ахун, Жетікөл, Бесарық, Сәкен Сейфуллин, Ақжарма және Асқар Тоқмағанбетов ауыл­­дары игі іске үн қосқан. Ауыл ақсақалдары мен жанашыр азаматтар түсіндірме жұмыс­­тарын жүргізіп, ауыл дүкендерінде ішімдік сатылуын тоқтатуда. Бұл бастама өзге де елдімекендерге үлгі болмақ.

Ішімдіксіз орта қалып­тастыру арқылы отбасындағы тату­лықты нығайтып, қоғамдық тәртіпті сақтауға және жас­тардың саламатты өмір салтын ұстануға жол ашылады. Мұндай бастаманың нәтижесі әр тұрғынның жауапкершілігі мен ортақ ниетіне байланыс­ты. Ауылдың тыныштығы мен балалар болашағы бәрінен қымбат. Сондықтан ішімдіксіз өмір салтын қолдау дені сау ұрпақ пен берекелі қоғам қалыптастыруға қосылған ма­ңыз­ды үлес деуге негіз бар.