Қос орталық жұмыс жасауда
Ел Президентінің халық денсаулығын нығайтуға бағытталған тапсырмалары аясында еліміздің барлық өңірінде ана мен бала денсаулығын қорғауға ерекше көңіл бөлінуде. Осы бағыттағы маңызды жобалардың бірі – балалардың дамуындағы ерекшеліктерді ерте кезеңде анықтап, дер кезінде көмек көрсетуге арналған «Даму» және «Ерте араласу» орталықтарының жұмысы. Бүгінде мұндай орталық Сырдария аудандық ауруханасы жанынан ашылып, тұрғындарға сапалы қызмет көрсетуде.Орталықтың басты мақсаты – нәрестелер мен бес жасқа дейінгі балалардың физикалық, психикалық, сөйлеу және әлеуметтік дамуын тұрақты бақылап, қандай да бір даму ерекшеліктері байқалған жағдайда ерте кезеңде анықтап, түзету жұмыстарын жүргізу. Мамандардың айтуынша, дамуындағы өзгерістерді алғашқы жылдары анықтау баланың болашақтағы толыққанды өмір сүру мүмкіндігін едәуір арттырады.
«Даму» және «Ерте араласу» орталығында мультидисциплинарлық тәсіл қолданылады. Мұнда педиатр, балалар невропатологы, психолог, логопед, дефектолог және басқа да бейінді мамандар бірлесіп жұмыс істейді. Әрбір балаға жеке даму жоспары жасалып, оның қажеттілігіне сәйкес медициналық және психологиялық-педагогикалық қолдау көрсетіледі.
Орталық қызметінің тағы бір маңызды бағыты – ата-аналармен тығыз байланыс орнату. Мамандар баланың даму ерекшеліктерін түсіндіріп, үй жағдайында орындалатын жаттығулар мен күтім тәсілдерін үйретеді. Сонымен қатар ата-аналарға психологиялық кеңес беріліп, баланың әлеуетін толық ашуға бағытталған ұсыныстар жасалады. Мұндай кешенді жұмыс отбасының белсенді қатысуына негізделгендіктен, оң нәтижеге қол жеткізу мүмкіндігі арта түседі.
Сырдария аудандық ауруханасында балалардың сапалы медициналық көмек алуына қолайлы жағдай жасалған. Ауданда денсаулық сақтау саласын жаңғырту аясында жаңа диагностикалық құрылғылар іске қосылып, медициналық қызметтің қолжетімділігі кеңейіп келеді. Осы жұмыстардың жалғасы ретінде емхана жанынан «Даму» және «Ерте араласу» орталығының ашылуы – аудан тұрғындары үшін маңызды әлеуметтік жоба болды.
Ерте араласу – тек емдеу ғана емес, баланың болашағына салынған инвестиция. Сондықтан мамандар ата-аналарды жоспарлы профилактикалық тексерулерден уақытылы өтіп, баланың дамуындағы кез келген өзгеріске бейжай қарамауға шақырады. Уақытында көрсетілген көмек көптеген қиындықтың алдын алып, балалардың дені сау, бақытты болып өсуіне мүмкіндік береді.
Сырдария аудандық ауруханасындағы «Даму» және «Ерте араласу» орталығы алдағы уақытта да аудан балаларының саулығын нығайтуға, ерекше күтімді қажет ететін бүлдіршіндерге жан-жақты қолдау көрсетуге бағытталған жұмыстарын жалғастыра бермек.
