Қызылорда облысында «Ауладағы қабылдау» республикалық акциясы жалғасуда
Қазақстан Республикасы Ішкі істер министрлігінің бастамасымен және «Заң мен тәртіп» қағидаты аясында 20–26 шілде аралығында еліміз бойынша «Ауладағы қабылдау» республикалық акциясы өткізілуде. Аталған акция Қызылорда облысында да өз жалғасын табуда.Акция аясында Қызылорда облысы Полиция департаменті бастығының орынбасары, полиция полковнигі Абдраманов Ермахан Әділханұлы тұрғындармен «Ауладағы қабылдау» форматында кездесу өткізіп, азаматтардың өтініштері мен ұсыныстарын тыңдады. Кездесу барысында қоғамдық қауіпсіздікті қамтамасыз ету, құқық бұзушылықтардың алдын алу, жол қозғалысы қауіпсіздігін сақтау және өзге де өзекті мәселелер бойынша түсіндіру жұмыстары жүргізілді.
Акцияның үшінші күні облыс аумағындағы 199 әкімшілік учаскеде тұрғындармен кездесулер ұйымдастырылып, оған 1474 азамат қатысты. Оның ішінде 504 тұрғын өз ұсыныстары мен өтініштерін жеткізді.
Көтерілген мәселелердің басым бөлігі бойынша қолданыстағы заңнама талаптарына сәйкес құқықтық түсіндірмелер мен кеңестер берілді. Ал қосымша зерделеуді немесе өзге мемлекеттік органдармен бірлесіп қарауды қажет ететін мәселелер Қызылорда облысы Полиция департаменті басшылығының ерекше бақылауына алынды.
«Ауладағы қабылдау» акциясының негізгі мақсаты – халықпен ашық әрі тиімді кері байланыс орнату, азаматтардың мәселелерін мемлекеттік органдармен бірлесіп шешуге ықпал ету және тұрғындардың құқықтық сауаттылығын арттыру.
Қызылорда облысы Полиция департаменті тұрғындарды өз аумақтарында ұйымдастырылатын «Ауладағы қабылдау» акциясына белсенді қатысуға шақырады. Бұл – полиция қызметкерлерімен және мемлекеттік органдардың өкілдерімен тікелей пікір алмасып, өзекті мәселелерді талқылауға және заң аясында тиісті құқықтық көмек алуға мүмкіндік беретін тиімді диалог алаңы.
