«Руханият – ізгілік пен парасат ордасы» атты рухани мәдени іс-шара легінің бастауы орталықтағы АХАТ бөлімінің ұйымдастыруымен өтті. Рухани әлемге бой алдырып, ізгілікке бастайтын іс-шараға аудан ардагерлері, мәде­ниет қызметкерлері, облыстық «Анаға тағзым» орталығынан арнайы келген қонақтар қатысты. Адам баласының тал бесік пен жер бесіктің аралығында өрілген өмір кезеңдерін құжаттамалайтын АХАТ бөлімінде өткен іс-шара «Мерейлі отбасы – тәрбиенің алтын бесігі» тақырыбын арқау етті. ҚР Білім беру, ҚР Мәдениет саласының үздігі, Сырдария ауданының Құрметті азаматы Сансызбай Сәдуақасов пен жұбайы Ханшайым Ерғалиеваның отбасын құрғанына 55 жыл то­луы­на орай отбасына куәлік табыстау рәсімі өтті. Мәдениет – ұлттың мәйегі, өнер – халықтың қазынасы, баға жетпес құндылығы десек, бұл ретте жақында 75 жасқа толған мәдениет майталманы кейінгі буынға үлгі-өнегесін көрсетіп, ақсақалдық ақ батасын берді. Кездесу барысында мәуелі бәйтеректің саясынан өркен жайған ұл-қыз өнерлерін ортаға салып, концерттік бағдарламаға ұласты.

Кезекті іс-шара тарихи-өлкетану музейінде өтіп, қатысушылар шебер қолды өнегелі жол иесі Алтын Нұртаеваның көрмесімен танысты. Білім саласының ардагері, қолөнер шебері өз туындыларын таныстырып, шеберлік сағатын өткізді. Ұлттық қолөнерді насихат­тау, жас ұрпаққа өнеге ету мақсатында ұйым­дастырылған кездесу барысында Алтын Нұртайқызы өзінің өмір жолын, ұстаздық қызметін, қолөнерге қызығушылығы туралы айтып, көрмеге қойылған өз қолымен жасаған туын­дыларымен таныстырды. Көрмеде шебердің ұлттық нақышта тігілген бұйымдары, құрақ көрпелері, сәндік және қолөнер туын­дылары көпшілік назарына ұсынылды. Шебер­лік сағаты барысында қатысушылар қолөнер бұйымдарын жасау әдістерімен танысып, тәжіри­белік кеңес алды. Кездесуде музей бас­шылығы Алтын Нұртайқызына ұлттық қолөнерді дамытуға қосқан үлесі үшін Алғыс білдіріп, сый-сияпат көрсетті.

Одан кейін қонақтар мен қатысушылар «Ұлағат» әкелер және «Ару ана», «Сыр ана» әжелер ансамбльдерінің өнерімен танысты. Үкіметтік емес ұйымдар жанынан құрылған ансамбл­ьдерде ардагерлер өз өнерлерін көр­сетіп, ауданда ғана емес, облыс, республика көлемінде өнерлерін паш етуде. Өз кезегінде ардагерлер бос уақытын тиімді өткізіп әрі кейінгі буынға үлгі-өнеге көрсетіп келеді.

Сондай-ақ руханият ордасына айналған орталық фоесінде «Сыр елінің шежіресі – аудандық архив қорында» атты көрме ұйым­дас­тырылды. Аудандық архив құжаттары негізінде әзірленген көрмеден қатысушылар өткенге көз жүгіртіп, көп мәлімет алды. Мұнда аудан орталығындағы көшелер Кеңестік атаулардан, мектептер коммунистік көсемдер есімдерінен арыла бастағаны туралы құжаттар, Ұлы Отан соғысы ардагерлерінің со­ғыс жылдарында ал­ған ордендері мен медальдарының куәліктері, марапаттары, суреттері мен газет беттерінде жария­ланған мақалалары қойылды. Әрбір құжат сонау замандардан сыр шертіп, тарихқа саяхат жасалды.

Одан кейін Жастар ресурстық орталығының фотосуреттер көрмесімен танысқан көпшілік «Coffee talk» жобасы аясында еркін фор­маттағы сұхбатқа және «Жайдарман LAB» шығар­машылық ой талқысы идея алаңында болып, жас­тардың жетіс­тіктерімен танысты.

Жоба аясындағы кезекті іс-шара аудандық орталық кітап­ханада жалғасты. Бұнда балалар кітап­ханасы мен орталық кітапхана қыз­меткерлері келушілерге бірнеше іс-шараны ұсынды. «Ертегі тыңдап есейдім» жобасы аясында «Түлкі мен маймыл» атты қазақ ерте­гісінен қуыршақ театрының қойылымы қойылса, «Замандастар» ток шоуында Мемлекет басшысының «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығына сәйкес арнайы оқуға ұсынылған жеті әдеби кітапты насихаттау мақсатында жазушы Оралхан Бөкейдің «Ұйқым келмейді» шығармасы талданды. Кітап оқуды жанына серік еткен қатысушылар аталған шығарманы жүйелі талдап, ерекше әсер сыйлады. Сондай-ақ «Өлке болып оқимыз» жобасы аясында Қазақстан Жазушылар Одағының мүшесі, жергілікті ақын, аудармашы Сейфолла Оспанның шығармашылығына арналған «Ақынын ардақтаған ел бақытты» атты әдеби-жыр кеші өтті.

«Рух керуені» жобасы аясында аудандық Руханият орталығында өткен іс-шара ұлттық құндылықтарды дәріптеуге, мәдени мұраны насихаттауға және тұрғындардың рухани да­муы­на серпін берді. Тағылымы мол кездесулер мен мазмұнды мәдени іс-шаралар қатысу­шылардың таным көкжиегін кеңейтіп, ұлттық мәдениетке деген қызығушылығын арттырды.

– Жобаның алғашқы кезеңінде аудандардағы мамандар біздің орталыққа арнайы келді. Ол кезде семинарлар өткізіліп, қызықты басқосулар өтті. Бұл – жобаның екінші кезеңі. Негізгі мақсат – әр аудандағы «Руханият орталығы» жұмысын жандандыру. Өздеріңіз білетіндей, орталықта бірнеше мекеме біріктірілген. Руханият пен мәдениетті насихаттап жүрген мамандардың бір-бірімен бірігіп жұмыс жасауы, ұйымшылдықты арттыру, аудандардың өзара тәжірибе алмасуы маңызды. Осы орайда жүзеге асып жатқан жобаның үшінші кезеңі де бар. Ол кезеңде оқыту жұмыстары және жобаның қорытындысы болады. Алдағы уақытта да осындай игі бастамалар жалғасын тауып, қоғамның рухани жаңғыруына, жастардың бойын­да отансүйгіштік пен ұлттық құндылықтарға деген құрметтің қалыптасуына өз үлесін қоса береді деген сенім мол. Рухани байлық пен мәдени мұраны ұлықтау – ел бірлігі мен ұлт болашағының кепілі, – дейді облыстық «Анаға тағзым» орталығының редакторы Гүлсім Нұрланқызы.