Конференцияны аудандық экономика және қаржы бөлімінің басшысы Е.Ахетов ашып, жүргізіп отырды. Жиын барысында мемлекеттік аудит жүйесінің маңыздылығы, бюджет қаражатын тиімді әрі заңды пайдалану тетіктері, сондай-ақ қаржылық тәртіпті нығайту бағытындағы жұ­мыс­тар кеңінен талқыланды.

Конференция барысында Қызыл­орда облысы бойынша Тексеру комис­сиясының мемлекеттік аудит бөлімінің жетекшісі Б.Ниеталиев баян­­дама жасап, мемлекеттік аудит жүргізу кезінде жиі анықталатын кемшіліктер мен заңбұзушылықтарға тоқталды. Ол өз сөзінде бюджет қаражатын жоспарлау мен игеру барысында құжаттардың дұрыс рәсім­делмеуі, қаржылық есептіліктегі сәй­кессіздіктер, мемлекеттік сатып алу рәсімдеріндегі қателіктер секілді мәселелер жиі кездесетінін атап өтті.

– Бүгінде мемлекеттік аудит жүйесі – бюджет қаражатының тиім­ді игерілуін қамтамасыз ететін ма­ңызды бақылау құралдарының бірі саналады. Бұл жүйе тек қаржылық заңбұзушылықтарды анықтап қана қоймай, олардың алдын алу іс-шараларын күшейтуге, мемлекеттік мекемелердегі жауапкершілікті арт­тыруға және қаржылық тәртіпті нығайтуға бағытталған. Осы орайда ұйым­дастырылған конференция мем­­лекеттік мекемелер арасындағы өзара тәжірибе алмасуға және сала­дағы түйткілді мәселелерді ортақ талқылауға мүмкіндік бер­ді. Сала мамандары күнделікті жұ­мыс барысында конференцияда көр­сетілген олқылықтарды ескергені абзал, – деген Б.Ниета­л­иев мұндай кем­шіліктердің алдын алу үшін мекеме басшылары мен қаржы қыз­меткерлерінің жауапкершілігін күшей­ту қажеттігін айтып, қаржылық сауаттылықты арттырудың маңыз­дылығына тоқ­талды.

Мемлекеттік аудиттің бас­ты мақсаты – тексеру жүргізіп, кем­шіліктерді анық­тау ғана емес, ең алдымен заң­бұзушылықтардың алдын алу және бюджет қаражатының тиімді жұм­салуына ықпал ету екені мәлім. Жиында облыстық мемлекеттік сатып алу басқармасының бас маманы М.Құрақбаев та баяндама жасап, мемлекеттік сатып алу саласында орын алатын негізгі қателіктерге тоқталды. Ол мемлекеттік сатып алу рәсімдерін ұйымдастыру кезінде заң талаптарын қатаң сақтау қажеттігін айтып, конкурс құжаттарын әзірлеу, келісімшарттарды рәсімдеу және жеткізушілермен жұмыс істеу барысында туындайтын мәселелер жөнінде жан-жақты түсіндірме берді.

Өз кезегінде мамандар қатысу­шылар тарапынан қойылған сауал­дарға нақты жауап беріп, тәжірибеде кездесетін мәселелер бойынша құ­қықтық және әдістемелік кеңестер ұсынды. Бұл өз кезегінде мекеме қызметкерлерінің кәсіби біліктілігін арттыруға және алдағы уақытта заңбұзушылықтардың алдын алуға септігін тигізетін маңызды алаңға айналды.

Кездесу қорытындысында қа­ты­су­шылар қаржылық бақылау саласындағы өзекті мәселелерді талқылап, бюджет қаражатын тиімді пайдалану бағытында өз ұсыныс­тары мен пікір­лерін ортаға салды. Мемлекеттік аудит жүйесін жетіл­діру, ашықтық пен есептілікті арттыру мәселесі кеңінен қозғалды. Аталған конференция мемлекеттік мекемелердегі қаржылық тәртіпті нығайтуға, бюджет қаражатын тиімді басқаруға және мемлекеттік аудит саласындағы өзара іс-қимылды жетілдіруге бағытталған маңызды басқосу болды. Мұндай кездесулер алдағы уақытта да жалғасып, мемлекеттік қызмет сапасын арт­тыру­ға оң ықпал етпек.