Дөңгелек үстел өтті
Қаржылық сауаттылықты арттыру – қай елдің, қай саланың болсын басым бағыты. Осы ретте қаржылық тәртіпті нығайту, қаржылық құқықбұзушылықтарды және оларға итермелейтін себептерді, жағдайларды жою және жол бермеу мақсатында дөңгелек үстел өтті.Жиынға Қызылорда облысы бойынша тексеру комиссиясының мүшесі М.Сатлабаев, Қызылорда облысы бойынша тексеру комиссиясының бөлім басшылары С.Садикова, Ж.Абсат, Сырдария аудандық қаржы бөлімінің басшысы А.Есмағанбетова, Сырдария аудандық экономика және бюджеттік жоспарлау бөлімінің сектор меңгерушісі И.Мақаш, ауданға қарасты ауыл әкімдері аппараттарының және бөлімдерінің есепшілері қатысты. Қызылорда облысы бойынша тексеру комиссиясының ұйымдастыруымен өткен іс-шарада негізгі мәселе қаралып, баяндама оқылды. «Сырдария ауданының жергілікті бюджетінің қаражатын, мемлекет активтерінің пайдалануына және бюджетке түсетін түсімдердің толықтығы мен уақтылығына мемлекеттік аудит» аудиторлық іс-шара қорытындысы туралы Қызылорда облысы бойынша тексеру комиссиясының мүшесі Мирамбек Сатлабаев тоқталып:
– Мемлекеттік аудиттің тиімділік, сәйкестік типімен аудан бойынша 5 бөлім, 1 мемлекеттік мекеме, 1 кент, 4 ауылдық округі әкімінің аппараты қамтылған. Сондай-ақ үстеме тексерумен кент пен ауылдық округі әкімінің аппаратына ведомствалық бағыныстағы 6 ауылдық клуб пен мәдениет үйілері, 2021 жылдың 1 қаңтарына дейін осы аудит объектілеріне бағыныста болған мектепке дейінгі тәрбие мен оқытумен айналысатын 9 мемлекеттік ұйым қамтылған. Сонымен қатар мемлекеттік мекемелерде орын алған заң бұзушылықтар мемлекеттік аудит барысында қалпына келтірілді, – деді.
Күн тәртібіндегі негізгі мәселе талқыланған соң тексеру комиссиясы тарапынан алдағы уақытта Қазақстан Республикасы заңдылықтарының нормаларын бұзу және кемшіліктердің орын алуына жол бермеу ескертілді. Дөңгелек үстел соңында жиынға қатысушылар тарапынан ұйымдастырушыларға сұрақтар қойылып, тұшымды жауап алынды. Сондай-ақ ұсыныстар талқыланды.
«ТТ» ақпарат
