Татулық пен достықтың мекені
Елдегі достық пейіл мен бауырмалдық – бейбіт күннің, татулықтың темірқазығындай ең басты құндылық. 1 мамыр – татулық пен бірліктің жарқын мерекесі. Бұл күн – сан түрлі ұлт пен ұлыс өкілдері бір шаңырақ астында тату-тәтті өмір сүріп жатқан еліміздің ең асыл құндылықтарының бірі. Байтақ даламыз қазақ ұлтынан бөлек 130-дан астам этносқа ортақ Отан болып тұр. «Бірлік болмай, тірлік болмас», «Береке бастауы – бірлік, ел іші – тату тірлік» дейтін халқымыз үшін бұл күннің мәні мен маңызы айрықша.Берекелі бірліктің арқасында бүгінде экономикамыз өркендеп, ілгері басып келеді. «Дамудың сыры – бірлікте, табыстың сыры – тірлікте» демекші, ауданда бүгінде этнос өкілдері тату-тәтті өмір сүріп, егемендікті баянды, Тәуелсіздікті тұғырлы ету жолында еңбек етуде. Атап айтар болсақ, қазіргі таңда ауданымызда этнос өкілдерінен барлығы 453 тұрғын өмір сүруде. Оның ішінде молдаван, татар, орыс, кәріс, шешен, чуваш, өзбек, беларусь, неміс, еврей, украин, шеркес, тәжік, ұдмұрт, қырғыз секілді этнос өкілдері бір шаңырақ астына топтасқан. Этнос өкілдері аудан экономикасының өркендеуі мен әлеуметтік ахуалының жақсаруына атсалысып келеді.
– Еліміз – бірлік пен татулықтың ордасы. Біздің ауданымызда да этнос өкілдері тату-тәтті тұрмысын жалғастыруда. Олар сан түрлі іс-шараға белсенді қатысады. Көрме, қолөнер бұйымдарын, ұлттық тағамдарын дайындап, әртүрлі іс-шараның көркін келістіреді. Республикалық және облыстық деңгейдегі іс-шараларға аудандағы өзге этнос өкілдері белсенді қатысады. Сырдария ауданында республикалық дәрежедегі байқауларда мерейімізді асқақтатып жүрген этнос жастары Константин Луца, Никита Мясцовтарды мақтанышпен айтып өтуге болады. Және де ауданымыздың намысын қорғаған өзге этнос өкілдері облыстық, аудандық іс-шараларда сахна төрінен көрініп жүр. Былтыр «Ассамблея аруы – 2025» сұлулық байқауында бас жүлдені славян этносының белсендісі Лидия Мясцова жеңіп алғанын айтып өту орынды. Ауданда этносаралық қатынас жүйелі, – дейді аудандық қоғамдық даму бөлімінің басшысы Бейбіт Смайлов.
Қазақстан – бейбітшілік пен келісім арқылы әлемге үлгі. Қазақ халқы алмағайып замандарда тағдыр тәлкегімен бас сауғалаған жұртты бөле-жармай бауырына басты. Осылайша, қазақ халқының даналығы, кеңдігі мен сыйластығы түрлі этностың бір шаңырақ астында ұйысуына себепші болды. Айта кетейік, өңірімізде 30-дан астам этнос өкілдері тату-тәтті өмір сүреді. Бірлік – халқымыздың тұтастығы мен ырыс-ынтымағының, үйлесімді қарым-қатынасының, татулығының көрінісі. Тәуелсіз Қазақстан үшін ынтымақ пен тұрақтылық – ең басты байлық. Бүгінде еліміздегі этнос өкілдері тату-тәтті өмір сүріп, ортақ Отанымыздың дамуына өз үлестерін қосып келеді. Бұл – ұлттар арасындағы сыйластық пен өзара құрметтің нәтижесі, қоғамдағы бейбітшілік пен келісімнің берік іргетасы.
А.МҰХАНБЕТҚАЛИ
