Облыстық ардагерлер ке­ңесінің ұйым­дас­тыруы­мен өткен байқау майдангер аға ұрпақтың ерлігін насихаттау арқылы жалпы­адамзаттық және рухани құнды­лық­тарды дәріп­­теуді көздеді. Байқауға жоғары сынып оқушылары қа­тысып, үш кезең бойынша бақ сынады. Талапкер­лер алғашқы кезеңде өздерін таныс­тырса, екін­ші бөлімде «Менің атам – майдангер» тақырыбын қаламға арқау етіп, эссе жазды. Бұл кезең онлайн түрде жүзеге асты. Ал екінші кезеңде қатысушылар ақындық қабілетті шыңдап, майдангерге өлең шумақтарын арнады.

Нұрмат – 9 сынып оқушысы. Ол же­текшісі Әйгерім Ержанқызы­мен бірге осы байқауға үлкен ынтамен, тиянақты дайындықпен қатысқан. Талапты оқушы облыс орталығына мектебінің ғана емес, ауданның намысын қорғап барғанын айта кету орынды. Өз кезегінде тапқырлығымен, әдемі жыр өрнегімен көрермен ықыласына, қазылар алқасының қолдауына ие болып, қарсы­лас­тарынан оза шапты.

– Жеңіс күні – бұл біздің тари­­хымыздағы ең маңызды әрі қасиетті мерекелердің бірі. Бұл күн бізге бейбіт өмір сыйлаған батыр ата-бабаларымыздың ерлігін еске түсіреді. Олардың Отан үшін жанын аямай күрескенін білу – біз үшін үлкен мақтаныш. Жеңіс күні тек өткенді еске алу ғана емес, сонымен қатар болашақ ұрпаққа бейбітшіліктің қадірін түсіндіретін күн. Соғыссыз өмір сүру – ең үлкен бақыт. Сондықтан біз ардагерлерге әрқашан құр­мет көрсетіп, олардың ерлігін ұмыт­пауымыз керек. Қазіргі таң­да ардагерлердің қатары сиреп бара жатыр. Сол себепті біз олардың әңгімелерін тыңдап, тарихты тереңірек түсінуге тырысуымыз қажет. Бұл – біздің парызымыз. Облыстық байқауға қаламыммен үн қосып, Яхия атаға арнау арнадым, – дейді белсенді оқушы Нұрмат.

Бүгінде облыстағы жал­ғыз көзі тірі ҰОС ардагері – Яхия Тасыров. Әркез келе­шек ұрпаққа өси­ет-өнегесін арнай­тын ардақ­ты ардагер қандай да құр­метке лайық. Небәрі он тоғыз жасында майдан дала­сына аттанған азамат майданда көрсеткен ерлігі үшін «Қызыл жұл­­дыз», І, ІІ дәре­­желі «Ұлы Отан соғысы» орден­дерімен, «Ерлігі үшін», «Гер­мания­ны жең­гені үшін», «Кеңес Ода­­ғының Батыры Маршал Г.Жу­ков», Ұлы Жеңістің мере­келік медаль­дарымен марапат­талған.

– Қызылорда облысының құр­метті ардагері, Сырдария ауданы­ның құрметті азаматы Яхия атамызға оқушылармен бірге барып, майдангердің батасын аламыз. Облыстық байқау өтетіні туралы хабар келген бойда оқушыммен бірге да­йын­дыққа кірістік. Байқау қа­тысушыларының әділ бағасын ақын Нұрмат Мансұр, Қорқыт ата атындағы ҚУ аға-оқытушысы Сара Бақтиярова, Тәрбие, спорт және қосымша білім беру орталығының бөлім басшысы Жұлдыз Асқарова бергенін айта кету орынды. Оқушым Нұрмат – жан-жақты, шығар­машылық қабілеті жоғары, ойы ұшқыр білімпаз. Ол ақындық өнерге бейім, өз ойын көркем тілмен жеткізе біледі. Сөз саптауы анық, тілі бай, әдебиетке деген қызығушылығы ерекше. Сонымен қатар ол – белсенді дебатер. Пікірталас барысында логикалық ойлау қабілеті, шешендігі және қарсы пікірді құрметтей отырып жауап беру мәдениеті жоғары деңгейде көрінеді. Көшбасшылық қасиеті де айқын байқалады, – дейді оқушысының қабілет-қарымын шыңдап жүрген ұстазы Әйгерім.