Жақында Әбділда Тәжібаев атын­дағы №36 мектеп-лицейде «Балалар әдебиеті – рухани тәрбие бастауы» атты онкүндік аясында Шаһарбек Нұрсейітпен кездесу өтті.

Әрине, мемлекеттік білім беру сала­сындағы саясатты жүзеге асыру барысында балаға ұлттық құнды­лықтарды, қазақ әдебиетін сіңіре білу маңызды рөл атқарады. Мектеп-лицей директоры Айнұр Әлиева кездесу кешін ашып, қаламгердің шығармашылығына тоқталды.

– Мектеп-лицей кітапханасында ұйым­дастырылып отырған «Балалар әдебиеті – рухани тәрбие бас­тауы» атты онкүндік – өскелең ұрпақ­тың рухани дүниесін байытуға, олардың кітапқа, көркем әдебиетке деген қызығушылығын арттыруға бағыт­талған маңызды іс-шаралардың бірі. Бүгін осы онкүндік аясында қаламгер Шаһарбек Нұрсейітпен кездесу – баршамыз үшін ерекше мағыналы, тағылымы мол басқосу деп есептеймін. Шаһарбек Нұрсейіт – аудандық газетте мазмұнды мақалаларымен танылып жүрген, қазақ тілі мен әдебиетінің жанашыры, қазақ тілі қоғамында белсенді еңбек етіп келе жатқан азамат. Оның шығармашылық жолы – ізденіс пен еңбектің, табан­дылық пен жауапкершіліктің айқын көрінісі. Бірнеше кітаптың авторы ретінде ол ұлттық руханиятымыздың дамуы­на өзіндік үлесін қосып, оқырман жүрегінен орын тапқан қаламгер. Қазіргі жаһандану дәуірінде жас ұрпақтың санасына ұлттық құнды­лықтарды сіңіру, олардың рухани-адамгершілік болмысын қалыптастыру – білім беру ұйым­­дарының басты міндеттерінің бірі. Осы тұрғыдан алғанда, балалар әде­биетінің алар орны ерекше. Себебі бала жүрегіне жол табатын, оның ой-санасын қалыптастыратын ең тиімді құрал – сапалы көркем шығарма. Оқушылар қаламгерге өздерін тол­ған­дырған сұрақтарын қойып, еркін пікір алмасу арқылы әдебиетке деген қызығушылықтарын арттыра түседі деп сенемін, – деді Айнұр Тоқшылыққызы.

Жалпы алғанда, іс-шараның мақсаты – оқушыларды қаламгердің өмір жолы және шығармашылығымен таныстыру, оның еңбектерін насихаттау және кітап оқуға деген қызығушылықтарын арттыру екені анық. Арнайы кітап көрмесі ұйымдастырылып, Шаһарбек Балтабайұлының еңбектері көпшілік назарына ұсынылды. Бұл ретте ақпа­рат саласының майталман маманы тағылымды кездесуге шақырған мектеп-лицей ұжымына алғыс айтты.

– Ең алдымен, мені мән-мағынасы зор іс-шараға шақырғандарыңыз үшін шынайы алғысымды білдіремін. Осындай тағылымы мол, тәрбиелік мәні жоғары іс-шараның өскелең ұрпақ үшін маңызы ерекше деп білемін. Бүгінгі кездесуде сіздермен өз шығармашылық жолым, жазу­шылық ізденістерім, редакция қабырғасында жүргендегі еңбек­терім туралы ой бөлісуді мақсат еттім. Менің бірнеше кітабым жарық көрді. Кітап – сендердің ең сенімді достарың. Көп оқыған сайын ойларың тереңдеп, дүниетанымдарың ке­ңейе түседі. Әдебиет арқылы адам өмірді түсінеді, өзін таниды, жақсы мен жаманды ажырата біледі. Сондықтан кітап оқуды әдетке айналдырыңдар. Осындай кез­десулер арқылы біз бір-бірімізбен рухани байланыс орнатып, ой бөлісіп, жаңа серпін аламыз деп сенемін. Сіздердің қызығушылықтарыңыз бен сұрақтарыңыз мені әрдайым жаңа ма­қалалар жазуға жігерлендіреді, – деді Шаһарбек Балтабайұлы.