Осыған байланысты аудан әкім­дігінде кадрлық өзгерістерге орай актив отырысы өтті. Оған аудан әкімі Берік Сәрменбаев, аудандық мәс­лихат төрағасы Ержан Әжікенов, облыстық мәслихат депутаты Жұмабек Ембергенов, «AMANAT» пар­тия­сы аудандық филиалының атқарушы хатшысы Ақтөре Ибрагимұлы, аудандық ардагерлер ке­ңе­­сінің төрағасы Мұса Келдібаев, қоғамдық кеңес төрағасы Марат Еспенбетов, аудандық мәслихат депутат­тары, мекеме және бөлім бас­шылары қатысты. Ауылдық ок­руг әкімдері ZOOM платформасы арқылы қосылды.

Аудан басшысы 2022 жылдан бері Тереңөзек кентінің әкімі қыз­метін атқарып келген Ержан Бахтияровты құрметпен шығарып салды.

– Тереңөзек кентінің әкімі қыз­метін атқарып келген Ержан Бах­тияр­ұлы ауданның әлеуметтік-эко­но­­ми­калық дамуына үлкен үлес қосты. Мемлекеттік-құқықтық жұ­мыс­­­тар, жергілікті басқару және коммуналдық шаруашылық сала­­­ларында жинақтаған мол тәжі­рибесін тиімді пайдалана отырып, аудан орталығын дамыту бағы­тында маңызды міндеттердің сапалы орындалуын қамтамасыз етті. Кентте инфрақұрылымды дамыту, көшелерді асфальттау, жарық­­тан­дыру, жаяу жүргіншілер жолын салу, көп­қабатты тұрғын үй аулаларын, демалыс орын­дарын абаттандыру, көркейту-көгал­дандыру, ойын алаңдарын салу, жалпы тұрғындардың тұр­мыс сапасын арттыруда нақты нәти­желерге қол жеткізді. Аудан орталы­ғындағы аяқсу мәселесінің шешімін табуына да қажырлы еңбек етті. Ержан Бахтиярұлына адал еңбегі, кәсіби біліктілігі мен ұйымдастырушылық қабілеті үшін өзімнің және аудан халқы атынан шынайы алғыс білдіремін, – деді Берік Әбдіғаппарұлы.

Жиында әдан әкімі ауданның әлеу­меттік-экономикалық дамуына үлес қосқан Ержан Бах­тияровқа «Құрмет грамотасын» табыс­тады. Құрмет төрінен көрінген азамат жиналған жұрт­шылыққа алғысын жеткізіп, ізгі тілегін білдірді.

– Кәсіби маманға қандай қызмет болса да, аса жауапкершілік жүк­теледі. Тереңөзек кентінің әкімі қызметінде жүріп, халық сенімінен шығу мақсатында әріптестермен бірлесіп қызмет еттік. Үнемі жер­гілікті халықтың уәжін тыңдап, тынымсыз еңбек етуге барымызды салдық. Бұл ретте басшылық тарапынан жүктелген міндетті орындау барысында жүйелі қызметке, саналы іс-әрекетке иек артып, кейбір мәселеде нақты нәтиже шығаруға ұмтылдық. Осы орайда әркез жұмы­сымызға қолдау көрсете білген аудан басшысына, әріптестеріме, жи­налған көпшілікке шынайы алғы­сым­ды айтамын, – деді Е.Бахтияров.

Басқосуда активке қатысушылар Ержан Бахтияр­ұлының аудан орта­лы­ғын дамытудағы еңбегін атап өтіп, жаңа бастамаларына сәттілік тіледі.

Айта кетейік, Тереңөзек кентінің әкімі лауазымына мемлекеттік қыз­мет саласында өзіндік тәжіри­бесі бар Нұржан Бисембаев сайланды. Оған аудандық сайлау комис­сиясының төрағасы Ермек Шайлан арнайы куәлік табыстады. Өз кезегінде жаңадан сайланған кент әкіміне аудан басшысы сенім біл­діріп, жұмысына сәттілік тіледі.

– Тереңөзек кентінің әкімі болып сайланған Нұржан Пернебайұлы еңбек жолын 2000 жылы «Оспан Мәлібаев» атындағы серіктестікте көмекші бригадир, гидротехник болып бастаған. Әр жылдары аудан­дық ауыл шаруашылығы және жер қатынастары бөлімінде жерге орналастырушы маман, аудандық құрылыс, сәулет және қала құры­лысы бөлімінің жетекші маманы, бас маманы, бөлім басшысы, Тереңөзек кентінің әкімі, аудандық кәсіпкерлік, өнеркәсіп және туризм бө­лімінің басшысы, аудандық тұрғын үй-коммуналдық шаруашылық, жо­лаушылар көлігі және автомобиль жолдары бөлімінің басшысы қыз­меттерін атқарған. 2024 жылдан бастап аудандық құрылыс, сәулет және қала құрылысы бөлімінің бас­шысы қызметін атқарып келді. Нұржан Пернебайұлына аудан орта­лығын дамытуға үлкен сенім артылып отыр. Тереңөзек кенті бар­лық елді мекенге үлгі болуы тиіс. Осыған байланысты кентті абаттандыру, көркейту-көгалдандыру жұ­мыстарын үнемі жүргізу қажет. Қа­таң бақылауда ұстауды тапсырамын, – деді Берік Әбдіғаппарұлы.

Жиында аудандық мәслихат төр­­ағасы Е.Әжікенов, аудандық арда­герлер кеңесінің төрағасы М.Келдібаев, Сырдария ауданының Құрметті азаматы Ұ.Жаналиева, аудандық қоғамдық кеңес төрағасы М.Еспенбетов жаңа сайланған кент әкімінің қызметіне сәттілік тіледі.