Жасұлан осыдан біршама жыл бұрын ауылдан шағын дүкен ашып, ауыл тұрғындарын азық-түлікпен қамтамасыз етуден бастаған. Былтырғы жылы кәсібін кеңейту мақсатында дүкен ғимаратын кеңейтіп, тиісінше қызмет көрсету көлемін ұлғайтқан. Бүгінде кәсіпкер ауылдағы мемлекеттік бағдарламаларды тиімді пайдаланғандардың қатарында. Осы жылы қайтарымсыз грант алып, 1 572 800 теңге қаржыға өзіне өзі қызмет көрсететін көлік жуу орталығын ашты. Өзінің «Аяла» дүкенінің жанынан ашқан жаңа көлік жуу орталығын заманауи үлгіде салған. Екі бөлек, яғни бір уақытта екі көлік жууға ыңғайлы етіп салынған орталықта жеңіл және жүк көлігінің иелері өзіне өзі қызмет ете береді.

– Негізгі мамандығым – тасымалды ұйымдастыру, көліктегі қозғалысты басқару. Отан алдындағы борышымды өтеген соң Құмкөл кешенінде жұмыс істедім. Кейін 11 жыл бойы Қарулы күштер қатарында әскери қызметте болдым. Отбасылы болған соң ата-анама қарайласып, ауылда кәсіппен айналысуды жөн көрдім. Бұрын шағын дүкеніміз болған. Дүкенді кеңейту мақсатымен қосымша құрылыс жүргізіп, жабдықтадым. Аралас сауда дүкені ауыл халқына қызмет етеді. Жұмыссыз ретінде арнайы курс оқып, қайтарымсыз грант алу мақсатында көлік жуу орталығын ашуға жоба дайындадым. Жобам қолдау тауып, биыл орталықты іске қостық. Әкем Жамаладдин еңбек адамы, механизатор болды, анам Шырынкүл совхозда аспазшы болып қарапайым жұмыс істеп, зейнеткерлікке шықты. Бес ағайындының төртіншісімін. Келіншегім Ұлжан ауылдағы балабақшада медбике. Қолы бос уақытында дүкен жұмысына көмектеседі. Төрт бала тәрбиелеп отырмыз. Қазір кәсіппен айналысамын деушілерге мүмкіндік бар. Бастысы сауатты, халыққа қажетті деген жобаның көзін тауып, қаражатты мақсатты жұмсауың керек. Ауылдан ашқан көлік жуу орталығы сұранысы бар кәсіп. Ауыл тұрғындарының кө­бісінде көлік, тех­ни­каның бірнеше түрі бар. Сондықтан бұл ор­талықтың жұ­мысына деген сұраныс артпаса, кемімейді, – дейді жас кәсіпкер Жасұлан Жамаладдинұлы.

Күніне жиырма шақты көлікке қызмет көрсетуге қабілетті ор­талық жұ­мысы бар­лық талапқа сай жабдықталған. Қажетті зат­тардың қатарындағы түрлі қоспалармен кө­лігін мұн­таздай етіп жуып алатын тұрғындар кез келген уақытта бұл қызметке жүгінеді. Бастысы су тоқтамай, электр қуаты өшпесе болғаны. Бұл ретте кәсіпкер суды тиімді пайдалану тұсын да ойластырған. Қосымша жерасты суын іске қосу үшін арнайы қондырғы орнатқан. Бұл да болса ауызсуды үнемдеуге, суды үздіксіз пайдалануға мүмкіндік береді.

Әрине, кәсіптің жаңа түрін бастау, дұрыс шешім қабылдау қиынның қиыны. Бұл ретте Жасұлан көп ізденгенін, «қандай кәсіп пайдалы, қайсысы табыс әкеледі» деп ізденіс үстінде болғанын айтады. Нәтижесінде дұрыс шешімге келгеніне қуанады.

– Кәсіпкерліктен хабарым бар. Тұрғындар арасында сұранысы бар бизнесті бастау ісі бірден туындаған жоқ. Біраз ойлануға тура келді. Отбасыммен кеңестім, пікірлеріне құлақ астым. Жан-жақтан сұрап, біліп, бұл істе қандай кедергі болатынына, қиындығы мен одан шығу жолына, кәсіптің тоқтап қалмауы үшін не істеу керек соған баса назар аудардым. Содан кейін барып, «көлік жуу орталығын ашамын» деген шешімге келдім. Ата-анам қолдады. Бұл бизнестің ең тиімді жағы – тұтынушы жағынан шағым болмайды. Себебі тұтынушы өзіне-өзі қызмет көрсетеді. Керегінше заттарды пайдаланып, қалаған уақытында көлігін жуып алады. Оның үстіне бағасы да қалтаға салмақ түсірмейді, – дейді отыз алты жастағы кәсіпкер.

Жас кәсіпкердің көлік жуатын орталығында ауыл тұрғыны өз автокөлігін жуып жатқанын көрдік. Көлік жуушылар сумен, көбікпен жуып, балауызбен жылтыратуға арналған тапанша-шаңсорғышпен көлігін тап-таза етіп алды. Тың кәсіпті қолға алып, өзіне өзі қызмет көрсететін орталық ашқан азаматтың бастамасына ауылдастары мен достары тілектестік білдіруде.

– Өзіне-өзі қызмет көрсету орталығының тұрақты тұтынушысымын. Ауылдағы көлік иелеріне ыңғайлы, аптаның жеті күнінде үзіліссіз жұмыс істейді. Бұрын қалаға барып көлігімізді жуғызатынбыз. Енді өз ауылымызда бар. Арасында көрші ауылдардан да келіп көліктерін жуып алатындарды да көреміз. Жас та болса ізденіп, кәсібін дөңгелетіп отырған Жасұланға ризамыз. Азық-түлік дүкенінде де қажетті заттың бәрі бар. Киім-кешекті де, үйге қажетті заттардың барлығын әкеліп қояды. Жыл сайын жаңарып, көркейіп келе жатқан ауылымыздың тіршілігі осындай адамдарымен құнды, – дейді ауыл тұрғыны Ардақ Жаңабайұлы.

Ауылда тың жоба ретінде бағаланып, ел игілігіне жұмыс істей бастаған орталыққа бас-көз болып отырған кәсіпкердің бастамасы ауыл тұрғындары үшін жақсы жаңалық болды. Әркім өзі үшін қызмет етуге машықтанса, ауылда мұндай орталықтардың маңызы артатыны сөзсіз.