Біз жас кәсіпкердің жұмысымен жан-жақты танысу мақсатында шина монтаждау орталығына бас сұққан бола­тынбыз. Күніне онға жуық автокөліктің дөңгелегін жөндейтін Самат Дәуітханұлы «Қазақ» және Әлішер Тоқмағамбетов көшесінің қиылысында орналасқан ғимаратты кәсіпкерлік бағытқа негіздеген. Теміржол саласында 11 жылдан бері еңбек ететін жас кәсіп иесі осы қызмет түрінің қыр-сырын айтып берді.

– Нарық заманында бір орында тоқтап қалуға болмайды. Үнемі ізденіс үстінде жүріп, табыс көзін есе­лейтін кәсіпті меңгеруге ұмтылыс керек. Біз отбасылық шағын бизнесті жандандыруға ден қойдық. Өзімнің әкем мен ағам әрқашан жәрдемдесіп, жан-жақты бағыт-бағдар беруде. Ағам Жасұлан Қашақов – 30 жылдық тәжіри­бесі бар дәнекерлеуші. Әрі ісіне мығым білікті маманнан үйренерім көп. Автокөлікті және өзге де темір бұйымын дәнеркелейтін шеберге күн­делікті келуші қатары көп. Шина монтаждауға керекті құрал-жабдықты алуға 4 миллион теңге қаражат жұмсадық. Аудан тұрғындарына сапалы қызмет көрсетуге дайынбыз, – деді шебер.

Негізінен Самат Дәуітханұлы – №210 Оспан Әбілпаттаев атын­дағы орта мектептің түлегі. Ол – отбасында үш ағайынды. Зайыбы Айдана Болатқызымен бірге үш перзент тәрбиелеп отыр. Жаңа кәсібін жетіл­діруге күш салып келе жатқан жас кәсіпкер автокөліктің 4 дөңгелегін 4 мың теңгеге ауыстырып береді. Ал дөңгелек резеңкесін жамату үшін тұтынушы 500 теңгесін жұмсайды.