«Айнұр» сауда үйі ашылды
Қазіргі қоғамда кәсіпкердің еңбегі ерекше маңызға ие. Оның ішінде халықты күнделікті тұрмысқа қажет дүниемен қамтамасыз етіп отыратын дүкендегі кәсіпкердің еңбегі ерек. Сөресін молайтып, күнделікті өмірімізде тұтынатын азық-түлік, киім-кешек, тұрмысқа қажетті заттардың барлығы да олардың қажырлы еңбегінің арқасында. Осы ретте еңбек адамына лайықты кәсіпкер отбасының бірі – Аппазовтар отбасы. Ауыл-аймаққа «Шархан» болып танылып кеткен «Айнұр» сауда үйі бүтіндей бір ауылды қамтамасыз етіп отыр.Чернобыль апатына қатысып, зейнетке шыққан ардагер Шархан Аппазұлы келіншегі Айгүл Әлібаевамен бірге сонау тәуелсіздік алғаннан кейінгі тоқырау заманында, елдің тұрмысы ауырлап, жұмыссыздық көбейген шақта үйінің аядай бір бөлмесінен шағын дүкен ашып, кәсіп бастайды. Қорқыныш пен сенімсіздікке қарамастан, бар күш-жігерін салып, жұртқа қажетті ең қарапайым тауармен қамтамасыз етіп отырды. Тоқырау кезеңінде О.Мәлібаев елді мекенінен бөлек Қалжан ахун, С.Сейфуллин ауылынан тұтынушы халық іздеп келіп отырған. Сол кішкентай бөлме уақыт өте келе ауыл халқының тірегіне айналып, көптеген отбасы дәл сол дүкеннің арқасында күнделікті азық-түлікке қол жеткізді.
Кішкентай көпқабатты үйдің астынан ашылған шағын дүкен бүгінде Қ.Бөдеев көшесінен кең, үлкен нысан болып «Айнұр» аралас сауда үйі қайта ашылды. Бұл – жылдар бойы төгілген еңбектің, табандылықтың және кәсіптің біртіндеп өркендеуінің айқын дәлелі. Бұрын бір ғана бөлмеге сыйған сауда орны қазір ауылдың негізгі дүкендерінің біріне айналып, тауар түрі көбейіп, қызмет көрсету сапасы да арта түсті.
Ауыл тұрғыны Бауыржан Күзембай ес білгелі осы дүкеннің тұтынушысы екенін айтты.
– «Айнұр» сауда үйі санитарлық талаптарға сай. Кәсіпкер Айгүл таңғы жетіден кешкі он аралығында үздіксіз тұрғындарға қызмет көрсетеді. Тоқырау заманында, екі-үш ай айлық алмаған кезіміз болды. Сол кезде бізді азық-түліксіз қалдырмай, сұраған затымызды шынайы ықыласпен беріп отырды. Өз тұтынушыларына әрдайым жоғары деңгейде қызмет көрсетіп, олардың қажеттілігін бірінші орынға қояды. Кім келсе де жылы қарсы алып, қажет тауарын тауып беруге тырысады. Осы ықыласы мен адамгершілігінің арқасында дүкенге келушілердің сенімі артып, тұрақты сатып алушылар қатары көбейе түсті. Жаңа сауда үйі берекеге толы болсын дегім келеді,– деп шынайы ықыласы мен алғысын білдірді.
Кәсіпкер бүгінде көмекшілерді жұмыспен қамтып, өз кәсібі арқылы тағы бір отбасының тұрмысын түзеуге ықпал етіп отыр. Бұл – кәсіпкердің тек табыс табуды ғана емес, ауыл азаматтарының жағдайын жақсартуды да басты міндет санағанының айғағы. Адал еңбекке мүмкіндік беру арқылы ол қоғамға өз үлесін қосып келеді.
Ақтоты ТЕМІРХАНҚЫЗЫ
