Күз ханшайымы мен ханзадасы атанды
Жақында Иса Тоқтыбаев атындағы №35 мектеп-лицейде 8-10 сынып оқушылары арасында «Алтын күз» мерекелік сайысы өтті. Оған арнайы қонақтар мен ұлағатты ұстаздар қатысты.Іс-шара барысында оқушылар күзгі табиғаттың әсемдігін, еңбектің қадірін жыл мезгілінің сыйын бейнелейтін көрініс пен шығармашылық бағытындағы қойылым ұсынды. Әр сынып өз өнерін ортаға салып, шығармашылық қабілетін байқата білді. Өз кезегінде өнерлі өрендер байқауда таныстыру, өз өнері, қамыр жаю және қолдан жасалған күзгі сән көйлегі кезеңі бойынша шеберліктерін көрсетті. Оқушылар нағыз күз ханзадасы мен ханшайымына лайық киім үлгісін қолдан жасап көрсетіп, көрерменнің қошеметіне бөленді. Мектеп-лицейдің талантты оқушысы Меруерт Астрахан скрипка аспабымен түрік әндерін сүйемелдеді.
Сайысқа төрелік еткен қазылар алқасының құрамында Сырдария аудандық қоғамдық даму бөлімінің бас маманы Гүлсән Қайратқызы, «Тіршілік тынысы» газетінің тілшісі Ақтоты Темірханқызы, мектеп директорының бейінді оқыту жөніндегі орынбасары Жанна Сәркеева, әуез пәні мұғалімі Айнұр Ахметова болды.
Өз кезегінде Сырдария аудандық қоғамдық даму бөлімінің бас маманы Гүлсән Қайратқызы сөз алып, мерекелік іс-шараны қорытындылады.
– Барлық қатысушы өте жақсы дәрежеде дайындалған. «Алтын күз» сайысына аса жауапкершілікпен қарап, әр кезеңде жақсы дайындықпен келгені көрініп тұр. Біз үшін таңдау өте қиын болды. Дегенмен сайыстың аты сайыс. Заманауи үлгіде сан түрлі киім үлгісін көріп, оқушылардың өнеріне тәнті болдық, – деді.
Осы ретте, сайыстың бас жүлдесін «Алтын күз» ханшайымы мен ханзадасы атанған 10 сынып оқушысы Қасиет Әділбекова пен Али Бақытбеков иеленді. Жүлделі І орын 9 сынып оқушысы Ұлдана Тәліпова мен Манас Мұхаммеджановқа бұйырды. ІІ орынды 9 сынып оқушысы Меруерт Астрахан, Нұркелді Нұрғазы және 8 сынып оқушысы Жібек Темірғалиева мен Нұрасыл Серғазиев қанжығасына байлады. ІІІ орынға 10 сынып оқушысы Айша Балтабай мен Бақытжан Айболұлы, 9 сынып оқушысы Дидарай Рахымбердина мен Елмұхаммед Амантай лайық деп танылды. Сыныбының намысын қорғап алға шыққан 8 сынып оқушысы Шамшырақ Төремұрат пен Ерсін Қорғанбай және Інжу Әбілқасымова, Әліби Бауыржанұлы «Алғыс хатпен» марапатталды. Сайысқа қатысқан 8 жұпқа бағалы сыйлық табыс етілді.
«Тт» ақпарат
