Төрт түлігі өрісте жайылған елді мекенде берекесі тасыған жергілікті халықтың өмір сүру дағдысы өзгеше. Ауылдың басым бөлігі бақшалық жеріне дәнді-дақыл орналастырып, ризық-несібесіне қол жеткізіп келеді. Егін және мал шаруашылығына икем­ді елдің қажетіне жарап тұрған «Жаңаарық» каналының жалпы ұзын­дығы 44 шақырымды құрайды. Оның негізгі сағасы – Қызылорда қаласына қарасты Тасбөгет кентінен бастау алады. Ұлы Отан соғысы жылдары қолдап қазылған каналдың атауы «Октябрь» және «ЛМК-3» болып өзгеріп, кейіннен «Жаңаарық» аталған. «Майарық», «Жаманқара», «Алтайбек», «Бидайкөл», «Аңламас» сынды көлге «Жаңаарықтан» аяқсу жіберіліп, күріш алқабы толықтай қам­тыл­ған.

– Бала күнімізден құмында ойнап өскен ауылымыздың әрбір бұрышы қасиетті тарихқа толы екенін жақсы білеміз. Мемлекеттік қызмет саласында еңбек ете жүріп, ауылдың ма­ңайын­да орналасқан көптеген тарихи жер жөнінде шағын мәлімет қорын жинауды негізгі жұмысыма айналдырдым. Елді мекенде «Жаңаарық» каналынан бөлек, «Қожаарық» арнасы бар. Қос каналды кезінде ел ағалары «өтелектеу» әдісімен қол­дан қазғандығын көпті көрген жандар айтқан болатын. Негізінен, «өтелектеу» әдісі бойынша сол кез­дегі жас бала шоғырын каналды қазу­ға жұмсаған. Сөздің реті келгенде айта кетейін, біздің өлкеде «қырық жігіттің» табандылығын жеткізетін көне­көз қария саны азайды. Кезінде Қарақұмның бойында қырық жігіт шөл даладан келе жатып, құдық қазып су шығара алмаған көрінеді. Ақырында шөл даладан су шығара алмаған қырық жігіт жан тәсілім еткен, – дейді Қоғалыкөл ауылдық округі әкім­шілігінің бас маманы Бақытжан Әбибуллаев.

«Әзенарық», «Астаукөл», «Абдра­зақ» секілді каналдың көбісі Қоға­лы­көл ауылының тыныс-тіршілігімен бай­ланысып жатыр. Барлық аяқсу жүретін арнаның өзіндік атқаратын қызметі бар. Су арнасының әрқай­сысын қаз­дыруда, ауылға аяқсу әкелу­де еңбек адамының қолтаңбасы жатыр. Әрине, ел бар жерде ешқашан қым-қуыт тіршілік ағыны таусылмайды.