Аудан үнжариясының тұрақты оқырманымын
Тарихы терең Сырдария ауданымен бірге жасасып келе жатқан төл басылымның тұрақты оқырманымын. Өз басым, газетті оқи отырып, рухани көкжиегімді кеңейтемін. Газеттің шығу барысынан хабардармын. Оған асқан ыждағаттылық пен жауапкершілік қажет. Бұл үдеден басылым ұжымы шығып келеді. Сексен алты жылдық тарихы бар газетті 79 жасқа келсем де, әлі күнге жанымнан тастамаймын.Алғаш «Сталин жолы» ретінде бас редактор Серғазы Абдуллаевтың жетекшілігімен оқырман жүрегінен жол тапқан газет қазіргі уақытта «Тіршілік тынысы» болып оқырманын қуантуда. Бірнеше жыл қатарынан іргелі ұжым газетті демеушілер есебінен жаздырып берді. Белгілі азаматтардың қаржысы есебінен газет үйімізге тұрақты келіп тұрды. Нарықтық уақытта газет бағасы аздаған өзгеріске ұшырап, жазылым құны 4000 теңге болыпты. Осы күні газет шығару барысында оған қажетті шикізаттың қымбаттауын ескерсек, бағаның өзгеруі – заңдылық.
Өзім секілді оқырман қауымды төл басылымнан қол үзбеуге шақырамын. Баспасөзге жазылу науқанында белсенділік танытып, ұжымға қолдау көрсету керек. Шығармашылығымен танылған іргелі ұжымның әрбір ісіне табыс тілеймін!
Зейнекүл ЕГІЗБАЕВА,
еңбек ардагері
