Әрбір он жылдықта кез келген ұжымда буын алмасу жүретіні мәлім. Алғаш қолына медициналық учили­щенің дипломын алған кезде Анар Қалыбекқызы 20 жастағы бойжеткен болатын. Отбасында 6 ағайындының ортасында өскен кейіпкеріміз жас кезінен саланың қыр-сырына қанықты. Денсаулық сақтау қызметінің ең күр­делісі саналатын зертханашы атану – асқан жауапкершілікті жүктейді. Үнемі көзге көрінбейтін жұмысының арқасында адам өмірін сақтап қалуға күш салатын зертханашы диагноздың дәлдігі, емнің нәтижелі болуы үшін аса ұқыптылықпен қан талдауын жасайды.

– Бұл мамандық – терең білімді, зор жауапкершілікті, төзімділікті талап етеді. Әрбір сынама мен сараптама – науқастың үміті, ал зертханашының епті қолы мен білімді көзі – сол үміттің шырақшысы екенін жақсы білемін. Микроскоп астында жасырынған сыр­қаттық белгіні байқап, адам өмірінің тағдырын шешетін маңызды деректерді табу – зертханашының күнделікті міндеті. Біздің отбасымызда ұрпақтар сабақтастығы берік орнаған. Анамыз Болған ауыл медицинасына серпін беріп, қыз-келіншектің денсаулығына бей-жай қарамаған ардақты жанның бірі. Акушерка ретінде ана мен бала денсаулығының жақсы болуына атса­лысқан. Бүгінде 80 жасқа толған анам­мен бірге жұмыс жасап, әріптес атан­ғаныма дән ризамын. Өз кезегінде анам­ның жолын сіңілім Гүлжауһар қуып, Қызылорда қаласындағы емдеу мекемесінде акушер-гинеколог ретінде қызмет етіп келеді. Бір айта кетерлігі, анамыз салып кеткен ізді өзімнің келінім Ұлбосын жалғастыруда, – дейді тәжірибелі зертханашы.

Көпшілік ғылым мен жанашырлық тоғысқан мамандық ретінде қарас­тыра­тын зертханашының еңбегі – төзім мен зейіннің үлгісі секілді. Биязы қал­пынан таймайтын біліктілігі жоғары маманның жастарға үйретері көп. Күн сайын науқастың қан талдауын жасап, нәтижесін дәрігерге ұсынады. Қолдағы сараптамалық талдауға байланысты дәрігер ауыл тұрғындарына ем-шара тағайындайды.

– Әрине, 38 жыл табан аудармас­тан бір мекемеде қызмет ету арқылы өз мамандығымның қыр-сырына қанық­қан жанның бірімін. Әрбір әріптесіммен кеңесіп, ақылдасып, амбулатория қыз­метіне жан бітіруге тырысамыз. Бізді жұртшылық сырқаттың себебін іздеп, жасушаның тілін түсініп, диагноздың кіл­тін табатын жан ретінде біледі. Зертханашы әрқашан көзге көрінбейтінді көреді, барды – дәлелдейді, жоқты – теріске шығарады. Зертхана ішіндегі тыныштықта – үлкен жауапкершілік пен сенім жатқанын жақсы сезінеміз, – дейді Анар Қалыбекқызы.

Жүрегі мейірімге толы зертханашы ауылдасы Сабыржан Наурызбаев­пен отасып, төрт перзентті дүниеге әкеледі. «Мағжан және К» ЖШС-де жұмыс істейтін ер азаматы үнемі зайыбына қолдау көрсетеді. Ардақты ана­ның ұл-қыздары жоғары білім алып, сан салада қызмет етіп жүр.