Жергілікті ақындарға арналған көрме

«Руханият орталығында» «Кітап – әлемнің бесігі» тақырыбында жергілікті ақындардың кітап көрмесіне арналған әдеби-танымдық кеш өтті. Кешті аудандық мәдениет үйі мен кітапхана қызметкерлері ұйымдастырды.

«Адал адам – мәдени тәрбие орталығы» тұжырымдамасының «Креативті HUB» жобасы аясында өткен іс-шарада оқырмандар мен поэзия сүйер қауымның басы қосыл­ды. Рухани кеш сөз құді­ретін танытып, жергілікті ақын­­дардың шығармашылығын наси­хат­тау мақсатын және жас ұрпақтың әдебиетке, кітапқа деген қызығу­шылығын арттыруды көздеді.

Алдымен кітапхананың пайда­ланушыларға қызмет көрсету бөлімінің меңгерушісі Индира Қартбаева Сыр өлкесінен шыққан ақындардың кітаптарымен, шығармашылық жолымен, қысқаша өмірімен таныс­тырды. Кітапханашы жақында ғана қазақтың көрнекті ақыны, сыншы, аудармашы Сейфолла Оспанның кітапханаға сыйға тартқан екі мың кітабынан жасақталған көрме туралы айтты. Сонымен қатар ақын Балашбек Шағыров, Сейтмұрат Ембергенов, Мұхтар Сақтапов, журналист Тынышбек Дайрабай және басқа да ақындардың шығармашылығын қамтыған кітаптары таныстырылды. Көрме бойынша шолу жасаған кітапханашы көрмеге ақындардың қолтаңбалары қойылған сирек кітаптары, мерзімді басылымдарда жарық көрген өлеңдері мен фотосуреттері енгізілгенін айтты.

Кітап – адам баласының ақыл-ойы мен рухани байлығының қазынасы. Ал сол кітаптың ішіндегі ең асыл жанр – поэзия. Сол поэзия әлемінде қалам тербеген жандар – ақындар. Рухани кеште туған өлкенің талантты перзенттері, жыр жауһарлары таныс­тырылды.

Шын мәнінде сөз – киелі. Ал сол сөзден өлең жазып, халық жүрегіне жеткізген ақындар – рухани байлығымыз. Тағылымды кеште өнерлі ұрпақтың өкілдері жергілікті ақындардың өлеңдерін оқыды.

Аудандық көркемсөз оқу шебері үйірмесінің мүшесі Бағдәулет Төлебай ақын Мұхтар Сақтаповтың «Тереңөзек» өлеңін, Тереңөзек кент клубының үйірме мүшелері Нұрәлі Замаддин ақын Балашбек Шағыровтың «Алтын жігіт» атты өлеңін, Нұрсұлтан Сүйіндіков «Балашбек ағаға арнау» өлеңін оқыды. Тереңөзек кент мәдениет үйінің қызметкері Ақтолқын Баймұратова «Тәлім» атты Тұрмағанбеттің термесін орындады.

Жас ұрпақтың әдебиетке, кітап­қа деген қызығушылығын ояту мақ­сатында өткен рухани кеш: «Кітап оқиық, өлең оқиық – өйткені кітап – әлемнің бесігі, өлең – жүректің үні» деген қорытындымен аяқталды.

Бибісара ТАҢАТАРҚЫЗЫ