Халық мәселесін оңтайландыратын ұжым

Жергілікті халық арасында «ЦОН» аталып кеткен іргелі мекемеде күнделікті адам аяғы басылмайды. Аурухана, жұмыспен қамту саласынан кейін халық көп шоғырланатын «Азаматтарға арналған үкімет» мемлекеттік корпорациясы» коммерциялық емес акционерлік қоғамының Қызылорда облысы бойын­ша филиалының Сырдария аудандық бөлімінде шаруасымен талай жанды кезіктіресіз. Цифрлық жүйе дамыған сәтте облыстық мәслихат депутаты Жұмабек Ембергенов жетекшілік ететін саланың ауқымы кең екенін аңғарып жүрміз.

Күні бойы көпшіліктің құжатын дайындауда қажыр-қайрат танытатын сала мамандары өздеріне жүктелген міндетті ыжда­ғат­тылықпен атқарады. Биыл «Аза­маттарға арналған үкімет» мем­­­лекеттік корпорация­сы» ком­мерциялық емес акцио­нерлік қоғамы 20 жылдық мерей­тойын тойламақ. Ал Сырдария ауданында аталған корпорация бөлімі 18 жыл бұрын ашылып, халыққа қызмет көрсете бастады. Өткен жылдың қыркүйек айында бекітілген жаңа редакция бойынша мемлекеттік көрсетілетін қызмет тізілім саны 1359-ды құрады. Бұдан бөлек, көптеген қызмет түрі қарастырылған.

Аудандық бөлімнің басшысы Жұмабек Ембергенов 2025 жылдың 6 айында атқарылған жұмыс туралы кеңінен мәлімет берді.

– Бөлімде 37 штаттық маман мен жұмысшы бар. Өзіне өзі қызмет көрсету секторында 2025 жылдың 6 айында 14795 мемлекеттік қызмет көрсетіліп, көпшілікке кеңес берілген. Бөлімде қызмет алушыдан қабыл­данған өтініш саны – 8861. Есепті мерзімде коммерциялық қыз­меттер бойынша орындаған қаражат соммасы 1 859 200 теңгені құрайды. Қызмет көрсету бағыты негізінде 60/40 пайызбен құжат қабылданып, цифрлық дамытуға ауқымды жұмыс жасалуда. Талон электрондық нұсқада беріліп, жаңа формат қосылуда. «Бірыңғай байланыс орталығы» арқылы, яғни «1414» нөміріне қоңырау шалып және өтініш білдірген мүм­кіндігі шек­теулі тұлғаның үйіне барып, 199 өтініш қабылданып қанағаттандырылды.

Айта кетейік, 2024 жылдың сәуір айында бөлімде құрылымдық өзгеріс орын алып, бірнеше мекеме біріктірілді. Қазіргі уақытта жер тіркеу және жер кадастры бойынша, әлеуметтік және ха­лыққа қызметтер көрсету бойын­ша бөлім жұмысы жандануда, – дейді Жұмабек Әшімұлы.

Жыл сайын еліміздің цифрландыру саласында ауқымды өзгеріс орын алып тұрады. Электрондық үкімет пен мемлекеттік қыз­мет­терді цифрландыру бойынша 2024 жылғы БҰҰ Е-үкімет индексі бойынша Қазақстан 24-орынға көтерілді. Онлайн-қызмет индексінде 10-орынға орналасты. Бұндай көрсеткішке қол жеткізу барысында жергілікті құрылымдық мекемелердің үлес салмағы зор. Бүгінде халыққа қызмет көрсету саласындағы бір­қатар оңтайлы өзгеріс жер­гілікті халықтың мәселесін шешуге бағытталады. Мұндайда «Азаматтарға арналған үкімет» мемлекеттік корпорациясы» ком­мерциялық емес акционерлік қо­ғамының Қызылорда облысы бойынша филиалының Сырдария аудандық бөлімінің мамандары алдына келген тұрғындарға сапалы қызмет көрсете бермек.

Б.АЯБЕКҰЛЫ