Трактор тізгіндеген әзиз аналар

Әр аптаның дүйсенбісі мен жұмасында газеттің кезекті нөмірі дайындалып, қарбаласып жататынымыз белгілі. Осындай қарбаласқа толы жұмыс барысында Аманкелді ауылының мәдениет үйінің ұжымы тарапынан ерекше іс-шараға шақыру келіп түсті. Бұл жолы ауылдағы мәдениет саласының мамандары дала еңбеккерлерін, оның ішінде шойын темірді жастанған нәзік жандылардың есімін ұлықтауға айрықша назар аударыпты. Яғни «Жұмысшы мамандықтар жылы» және «AMANAT» партиясының «Ардагерлерді ардақтайық», «Адал адам» мәдени-тәрбие орталығы тұжырымдамасының «Жанұя шуағы» жобасы аясында «Қыз болсам да темірді мойындаттым» тақырыбында кездесу кеші өткізілді.

Жақында кәсіпорын директоры қызметіне келген Рүстем Байділдаев бастаған ауылдық мәдениет үйінің мамандары ұйымшылдықтың жарқын үлгісін көрсетті. Аманкелді ауылына қарасты білім, денсаулық сақтау, мәдениет саласының мамандары қонақтарды құшақ жая қарсы алып, ыстық бауырсақ, нан, айран, құрт- ірімшік, жент секілді тағамдарды ұсынды. Шоққа піскен таба нан мен күбіден жаңа алынған сары май ауылдың дәмін сезіндірді. Диқан қауым жаз бойы күннің ыстығына қарамастан өсірген қауын-қарбызын барынша дәріптеді. Бұдан кейін іс-шара қонақтары мәдениет үйіндегі «Адал адам» мәдени-тәрбие орталығы тұжы­рымдамасының 7 бағыты бо­йынша атқарылған жұмысқа қанықты. Жергілікті қолөнер шеберінің қолдан жасалған бұйымын таныстырып, қазақы ойыншықтың ерекшелігіне тоқ­талды.

«Қыз болсам да темірді мойын­даттым» тақырыбындағы кешке «AMANAT» партиясының аудандық филиалының Атқарушы хатшысы Ақтөре Ибрагимұлы, аудандық мәдениет және тілдерді дамыту бөлімінің басшысы Анар Қалдыбаева, ауыл әкімі Зейнұр Жаманқұлов, аудандық мәслихат депутаты Руслан Қаскиев, мәдениет саласының майталманы Жантемір Айсин, ауыл шаруашылығы және білім саласының ардагері Байырбек Әмірбеков қатысты.

Кештің басты кейіпкерлері 17 жасында трактор тізгіндеген Ұлтай Әбіласанова, Әсемкүл Құлымбетова, Шолпан Сәдуақасова, Жанат Асқарова екенін айта кетейік. 1980 жылы мектеп бітіргеннен кейін шаруашылыққа жұмысқа келген ардақты аналар ауыр техниканы өздерінің ырқына көндірген. Кешті ашқан құрметті меймандар нағыз еңбеккерлердің өмір жолына тоқталып, ерекше құрмет көрсетті. Аудан әкімі Берік Сәрменбаевтың арнайы «Алғыс хатын» табыстады.

– Биыл Мемлекет басшысы Қасым-Жомарт Тоқаевтың тапсырмасы негізінде «Жұмысшы мамандықтар жылы» жарияланғаны белгілі. Кез келген ауылда еңбегімен танылған ардақты жандар көптеп табылады. Олардың есімін ұлықтау қай кезде де маңыздылығын жоймайды. Бүгін Аманкелді ауылындағы мәдениет үйінде тағылымды кештің куәсі болдық. Шын мәнінде, ер азаматтармен қатар елдік мүддені жоғары қойып, аттан түспеген аналарымыз қашанда бар құрметке лайық. Талай жылғы еңбектің негізгі көрінісі – бейнетпен қатар жүретін қайсарлық, мықтылық, табандылық деп білемін. Осы қасиеттер құрмет төрінен көрінген аналарымыздың бойынан табылады. «Қыз болсам да темірді мойындаттым» тақырыбындағы кездесу кешінің кейіпкерлерін өз уақытында нағыз май­талман маман атанған жандар ретінде білеміз. Еңбекпен есейген қадірлі жандарға ұзақ ғұмыр, отбасына амандық тілеймін. Темірдей төзімді, дала төсін дүбірлеткен ерлермен тең аналарымыз бар мақтауға лайық. Жер анамен сырлас, найзағайдай жарқылдап, дауылдай екпіндеген еңбек иелерінің өмірлері өнеге екені даусыз, – деді аудандық мәдениет және тілдерді дамыту бөлімінің басшысы Анар Қалдыбаева.

Өмір жолында талай қиындық пен ауыртпалықты еңсерген 5 қыз тракторшы қызметіне келеді. Оның ішінде, жылдар бойы еңселі еңбегімен танылған Шолпан Жұмабаеваның замандастарының ортасында жоқтығы өкінішті. Кеш барысында ауыл әкімі Зейнұр Жаманқұлов, ауылдық ардагерлер кеңесінің төрағасы Нұрмағанбет Құдайбергенов сөз сөйлеп, аяулы жандардың еңселі еңбегін жоғары бағалады. Ауылдастары атынан зор ілтипат көрсетті.

Шындығында, кеш кейіпкерлерінің жүріп өткен жолы бір кітапқа жүк болатын тарих екені даусыз. Мәселен, Ұлтай Әбіласанова 1980 жылы механизатор болып жұмысқа қабылданған. Бригадир Қызылбай Қоянбаевтың қарамағында темір тұлпарды тізгіндеп, шөп ору науқанына қатысқан. Осы жылдары ауылдық кеңеске қатарынан үш рет депутат болып сайланған. Облыстық съезге үш рет делегат болып, кейінгі жылдары қой қырқымда қой қырқып, аспаз атанған. Май құю бекетінде оператор, кітапхана меңгерушісі қызметін лайықты түрде атқарған. Ал Әсемкүл Құлымбетова мектеп бітірісімен трактордың рөліне отырған. Ауыр техниканы тіз­гіндеген асыл ана араға бір жыл салып, Бесарық ауылына техникалық қызметкер ретінде жұмысқа орналасады. Шолпан Сәдуақасова болса, алғашқы еңбек жолын әкесіне көмекші шопан болып бастаған. Содан кейін құрбылары сияқты механизатор болған. Кеңшарда еңбек етіп, партия қатарына қабылданған. Кең жүректі Жанат Асқарова ауыл шаруашылығын дамыту мақсатында Аманкелді атындағы Қаракөл қой шаруашылығы экспериментальді совхозына механизатор болып жұмысқа қабылданған. МТЗ-50 тракторының рөліне отырған. Шөп ору, тасу жұмыстарын жасаған. Бір жыл өткен соң су жаңа МТЗ-80 тракторын тізгіндеп, шөпті пресске басу, рулон пресс басу, роторлы шөп оратын агрегаттарымен жұмыс жасауды үйренген. Еңбегі еленіп, 18-ін­ші шақырылған облыстық кеңеске депутат болып сайланған. Жылдық жоспарды асыра орындағаны үшін 13-ін­ші бесжылдықтың үздігі медалімен марапатталған. Германияға туристік сапарға бару жолдамасына ие болған.

Тағылымы мол кеш барысында ардақты аналардың сыныптас достарының атынан Алтынбек Абдуллаев өткен күндердің естелігін тілге тиек етті. Сырлы сұхбат кезінде өз заманының тракторшы арулары бастан өткерген қызықты сәттерін тілге тиек етті. Ұйымдастырушыларға шынайы алғыстарын жеткізіп, жылы лебіздерін білдірді. Өз кезегінде көпшілікке концерттік бағдарлама ұсынылып, жергілікті өнерпаздар әннен шашу шашты.

Балтабай ОРДАБЕКОВ