Үздіктердің үздігі
Әлемде бір күнде бірнеше кітап оқитын жандар қатары аз емес. Мысалы, АҚШ-тың жиырма алтыншы президенті Теодор Рузвельт бір күнде 3 кітап оқып тауысатын болған. Ал Итальян жазушысы, философ Умберто Эконың кітапханасында 50 мың кітап қоры жинақталған. «Кітап оқы да, кемелден!» жобасына қатысқан оқушылар арасында 2 жыл қатарынан жеңімпаз атанған оқушылар бар. Олар өткен жылы өткізілген жобада дараланып, биыл да үздіктер қатарынан табылған.Біздің кейіпкеріміздің бірі – Айзере Аманжолқызы Ақжарма ауылындағы №130 Абай атындағы орта мектептің 9 сынып оқушысы. Білімді де зерек оқушы өткен жылы байқаудың бас жүлдесін жеңіп алса, биыл І орынды иеленді. Ол Бердібек Соқпақбаевтың «Балалық шаққа саяхат», Сайын Мұратбековтің «Жабайы алма», Бауыржан Момышұлының «Ұшқан ұя» кітабын оқыған.
– 2016 жылы Yale университетінің зерттеуіне сай, кітап оқитын адамдар кітап оқымайтындарға қарағанда орта есеппен 2 жылға ұзақ өмір сүретіні дәлелдеген. Кітап оқу арқылы адам кемелдене түседі. Қазіргі уақытта өзім секілді замандастарым кітап оқуға уақытын жұмсағысы келмейді. Кітап оқу – оқушының сауаттылығын арттырады. Ақын Нұрмат Мансұров пен Ақтөре Ибрагимұлының ұйымдастырған жобаның арқасында 2 мәрте үздіктер қатарынан көріндім. Мұндай жобалар оқушының шығармашылық әлеуетін арттырады, – дейді Айзере Аманжолқызы.
Ал «Жабайы алма» мен «Ұлпан» романын оқып, 2 жыл қатарынан жеңіс тұғырынан көрінген Шұғыла Әбдіразақ аудан орталығынан шалғайда орналасқан Іңкәрдария ауылының тұрғыны. Білімді оқушы отбасында 7 ағайындының кішкентайы екен. №191 орта мектептің оқушысы өз білімнің арқасында өзі секілді қатысушылардан оқ бойы озық шыққан. Шығармаларға талдау жасап, байқаудың барлық ережесі сай болған Шұғыла Әбдіразақ болашағының жарқын болуын кітап оқумен байланыстырады.
– Кітап оқығаным үшін бағалы сыйлық ұтып алғаныма дән ризамын. Жоба ұйымдастырушылары біз үшін берері мол кітаптарды таңдап алған. Оқушылар арасында шын мәнінде ерекше бәсекелестік болды. Кітапқа деген қызығушылық оянып, жеңімпаз болуға ұмтылдық. Қашанда кітап оқудың пайдасын көпшілікке айтып жүретін боламын. Оқыған адам дүниенің заңдылығын, мүмкіндігін түсінеді, – дейді Шұғыла Әбдіразақ.
Шаған ауылындағы №37 мектеп-лицейдің 9 сынып оқушысы Альбина Каменова да көптің қолы жеті бермеген жеңімпаздық тұғырдан көрінген. 2 мәрте жеңіс тұғырынан көрініп, бағалы сыйлығын қолына алған сәтте жетістіктің оңайлықпен келмейтінін сезінген.
– Мен алдағы уақытта жазушы болғым келеді. Мүмкін өзім оқыған шығармалар қатты әсер еткен шығар. Кітап оқу арқылы жазу өнеріне машықтанғым келеді. «Жабайы алма», «Менің атым – Қожа», «Мен – апамның баласымын» шығармасын оқу барысында әрбір кейіпкердің өміріне қанықтым. Оқиға желісіне қызықтым. Осындай жастарға берері мол жобалар көптеп жүзеге асса деген тілегім бар, – дейді Альбина Каменова.
Б.ОРДАБЕКОВ
