Берекелі кәсіп ерік-жігерден басталады

Қазіргі таңда табысты болумен қатар қоғамда өз орныңды табу – нағыз кәсіпкерліктің нышаны. Кәсіп бастау және оны дамыту үшін түрлі қиындыққа мойымай, алға ұмтылу кезінде адамның ішкі рухы, табандылығы аса маңызды. Осы орайда, саланың қыр-сырын біліп, үйреніп, саналы ғұмырын кәсіпкерлікке арнаған Шіркейлі ауылының тұрғыны Алтынай Бекбатырова – берекелі кәсіптің құрылтайшысы.

Қызылорда қаласының тумасы 1981 жылы өмірлік жары Байбол Айтбаевпен шаңырақ көте­ріп, Шіркейлі ауылына келін болып түседі. Жолдасы егін шаруашылығын қолға алған кәсіп иесі. Жеке қожалықтың құрыл­тайшысы әрі ауылдағы егіннің дамуына, өркендеуіне орасан зор үлес қосқан жанның бірі. Алтынай Бекбатырова жаңа нәрсе­ні бастауға ниеттеніп 2005 жылы жеке кәсіпкер болып тіркеледі. Бар күш-жігері мен шыдамдылығын осы кәсіпке арна­­ған. Екі баланың анасы бүгін­де сол бастапқы жылдарды есіне алып, қызықты сәттерімен бөлісті.

– Сол 2005 жылы жеке кәсіпкер болып тіркелгеннен кейін, жолдасым екеуміз қолымыздағы шамалы ақшамен бастап кеткенбіз. Тура 20 жыл болыпты бұл дүкен­нің ашылғанына. Осы жылдар ішінде түрлі қызық жайттар болды. Сүріндік те, құладық та, бірақ қайта тұрып, кәсібімізді тоқтатпай жалғастырдық. Міне, сол мойымай ең­бек еткеннің жемісі бүгінде жаңа ғимаратқа ауысып, көркейіп жатырмыз, – дейді кәсіпкер.

Сондай-ақ бұл кәсіптің негіз­гі бастау алуына сол 2000 жыл­­дардағы жоқшылық әсер еткенін, сонымен қатар жеке бизнесті қалып­тас­тырудың бастамасы бол­ғанын айтып, еске алуда. Бірақ осы жиырма жыл ішін­де кәсіп иесі мемле­кет­тік қолдауға жүгін­беген. Ешқандай кә­сіп­­керді қолдау бағ­дар­ламасына қа­тыс­паған. Тек өз еңбегі мен ерік-жігерінің ар­қасында бүгінде екі қабатты ғимаратқа ауы­сып, дүкен кө­лемін ұлғайтқан. Айта кетейік, бұл «Жан­­нұр» дүкенінде азық-түліктен бас­тап, тұр­мыстық заттар мен киім-кешектер, күнде­лікті балғын дәмдер мен тәтті тоқаш­тар және үй-жағда­йына қажетті бар­лық заттарды табу­­ға бола­ды. Сонымен қатар Алтынай Бекбатырова кәсіпкер ретінде бір адамды жұмыспен қамтып отыр.

– Қазіргі таңда кәсібімізді ұлғайту мақсатында және де фаст-фуд дәмханасын ашу мақ­сатында «Атамекен» бағ­дар­­ла­масына төменгі пайыз мөлшері­мен өтінім тастап көрдік. Жақында ғана тексеру комиссиясы келіп көріп кетті. Осы уақытқа дейін мемлекеттен қолдау алып көрмеп едік, енді бұйырса аламыз деп отырмыз, – дейді еңбекқор жан.

Кәсіпкерліктің жолы әрдайым тегіс емес. Қаржылық тәуекел, бәсе­келестік, құлдырау – бұның бәрі кез келген кәсіпкердің алдынан шығатыны анық. Осы сәтте күш-жігері мықты жандар ғана алға жылжып, дамиды. Берекелі кәсіп – жай ғана табыс көзі емес, ол адамның ішкі жан дүниесінің, өмірге деген көзқарасының көрінісі іспеттес. Өз кәсібін сүйіп істеген адам ғана биікке ұмтылары хақ. Бүгінде осы кәсіпкерліктің шыңынан көріне білген «Жаннұр» дүкенінің иесі – Алтынай Бекбатырова. Алдағы бастамаңыз мемлекеттен қолдау тауып, кәсібіңіз өркендей берсін демекпіз.

Гүлсезім ЖАНСЕРІКҚЫЗЫ